Мудофаа вазирлиги спорт мажмуасида Ўзбекистон Қуролли Кучлар вазирлик ва идораларнинг фахрийлари ўртасида спортнинг еттита тури бўйича ўзаро беллашув бўлиб ўтди. Бу ҳақда вазирлик матбуот хизмати хабар берди.
Мусобақадан кўзланган асосий мақсад — ҳарбий ветеранлар ва фахрийлар, уларнинг оила аъзолари маданий ҳордиқ чиқаришлари ва улар орасида соғлом турмуш тарзини тарғиб қилишдан иборат.
Таъкидлаш жоизки, бугунги кунда Мудофаа вазирлигида 17 мингдан ортиқ фахрийлар бўлиб, уларнинг кўпчилиги ёшларни ватанпарварлик руҳида тарбиялаш ишларида фаол иштирок этмоқда.
Беллашувда Мудофаа вазирлиги, Ички ишлар вазирлиги, Давлат хавфсизлик хизмати, Давлат хавфсизлик хизмати Чегара қўшинлари, «Ватанпарвар» ва «Ветеран» ташкилотларининг фахрийлари иштирок этди.
Мини-футбол, волейбол, шахмат-шашка, теннис, стол тенниси, арқон тортиш каби йўналишлар бўйича ўзаро куч синашган фахрий ҳарбий хизматчилар жисмонан бақувватлигини исботлашди.
Беллашув якунига кўра, Мудофаа вазирлиги фахрийлари умумжамоа ҳисобида биринчиликни қўлга киритган бўлса, иккинчи ўрин Давлат хавфсизлик хизмати фахрийларига насиб этди. Учинчи ўринни эса Ўзбекистон мудофаасига кўмаклашувчи «Ватанпарвар» ташкилоти фахрийлари эгаллади.
Изоҳ (0)