Минск очилиб бораётган Ўзбекистонда ўзининг иқтисодий иштирокини сезиларли равишда оширмоқчи. Бунга саноат маҳсулотлари экспорти ва қўшма ишлаб чиқаришларни ривожлантириш ҳисобига эришиш режалаштирилмоқда, деб ёзади Spot.
Кооперация муваффақиятли кечса, Ўзбекистон ўз саноатини техник жиҳатдан модернизация қилишга, Беларусь эса йирик чет эл бозорида ўз позициясини мустаҳкамлашга муваффақ бўлади, деган фикрда «Эксперт Евразия» лойиҳаси муаллифи, тарих фанлари номзоди Александр Шустов.
Баъзи йўналишлар бўйича икки мамлакат ўртасидаги савдо-сотиқ 2018 йилда икки хонали суръатларда ўсмоқда.
Масалан, «Беллесбумпром» корхоналари январь-апрелда Ўзбекистонга маҳсулот етказиб беришни ўн марта оширди. 2017 йилнинг январь-апрелида улар 220 минг долларни ташкил этган бўлса, бу йил 2,2 миллион долларга тенг бўлди.
Асосий экспорт маҳсулотлари дарахт қириндисидан плиталар, фанера ва ёғоч кимёси маҳсулотларидир.
«БелАЗ» ҳам Ўзбекистонга ўз маҳсулотларини етказиб беришни тез суръатларда ўстирмоқда. 2017—2018 йилларда республика учун 260 та оғир карер самосвалларини ишлаб чиқариш режалаштирилган. 2020—2023 йилларда яна 200 та самосвал етказиб берилади.
Ҳамкорликни қўшма корхоналар яратиш ҳисобига ривожлантириш режалаштирилмоқда. Бундай режалар фармацевтика саноатида муҳокама қилинмоқда, бу борада Минск ва Тошкент ҳамкорлик бўйича йўл харитасини имзолашга улгурди.
Бундан ташқари, кондитер маҳсулотларини ишлаб чиқариш бўйича қўшма корхона яратиш кўзда тутилган. Беларусь Ўзбекистон ҳудудида қишлоқ хўжалик гўшт-сут мажмуаларини яратишда қатнашишга тайёр.
Изоҳ (0)