Вазирлар Маҳкамасида Ўзбекистон Бош вазири Абдулла Арипов бошчилигида видеоселектор йиғилиши бўлиб ўтди. Йиғилишда мамлакатда ёшларга оид давлат сиёсати доирасида амалга оширилаётган ишлар, 30 июнда нишонланадиган «Ёшлар куни»ни муносиб кутиб олиш каби масалалар муҳокама қилинди, дея маълум қилади «Xabar.uz».
Абдулла Арипов Президент Шавкат Мирзиёев томонидан Ўзбекистон ёшларининг муаммолари, бу борада ечимини кечиктириб бўлмайдиган масалаларга ҳамиша эътибор қаратиб келаётгани, бу орқали барча раҳбарларга сабоқ бераётганига тўхталиб ўтган.
— Ўтган бир йил ичида ёшларга оид давлат сиёсати самарадорлигини оширишга қаратилган Президентнинг 3 та фармони ва 5 та қарори, Вазирлар Маҳкамасининг 16 та қарор ва 4 та фармойиши қабул қилинди. Турли соҳа ва тармоқларда юксак натижаларга эришаётган йигитларни муносиб тақдирлаш мақсадида «Мард ўғлон» давлат мукофоти таъсис этилди. Жамоат ишларида фаол ишлаб келаётган ёшлар «Келажак бунёдкори» медали билан тақдирланадиган бўлди.
Ёш оилаларни уй-жойи ва маиший шароитини яхшилаш мақсадида 2018—2021 йилларга мўлжалланган «Ёшлар уйлари»ни барпо этиш дастури тасдиқланди. Бунга кўра 8000 нафардан ортиқ ёш оила уй-жойга эга бўлади.
Ёшлар билим ва кўникмаларини шакллантиришига шарт-шароит яратиш мақсадида Ўзбекистон журналистика ва оммавий коммуникациялар университети, Термиз давлат университетининг Денов филиали, Тошкент давлат техника университетининг Олмалиқ филиали, Тошкент тиббиёт академиясининг Термиз филиали ташкил этилди, — таъкидлади Абдулла Арипов.
Бош вазирининг маълум қилишича, Ўзбекистонда яқинда Москва муҳандислик-физика институтининг филиали ҳам очилиши кутилмоқда. «Ўзбекистон раҳбари қайси давлатга расмий ташриф билан бормасин, бу ердаги энг машҳур олий таълим муассасаларининг филиалларини Ўзбекистонга олиб келишга катта этибор қаратиб келади. Москва муҳандислик-физика институти ҳам унча-мунча давлатда филиалини очавермайди. Бу ҳам бўлса, давлат раҳбарининг саъй-ҳаракатлари маҳсули», дея қайд этди Абдулла Арипов.
Изоҳ (0)