Вақтинча Самарқанд шаҳрида яшовчи А.Р. 21 июнь куни Самарқанд шаҳрида таниши билан ўзаро жанжаллашиб, олган тан жароҳати сабаб Тошкент шаҳридаги Чилонзор туманида жойлашган Республика шошилинч тиббий ёрдам илмий марказида ётқизилганди. Бу ҳақда ИИВ жамоатчилик ва ОАВ билан алоқалар бошқармаси хабар берди.
Самарқанд шаҳар ИИБ ходимлари томонидан олиб борилган дастлабки суриштирув ишлари натижасида шу куни А.Р.нинг таниши, Самарқанд шаҳрида яшовчи 1989 йилда туғилган Александра Безпятова ва унинг расмий никоҳсиз турмуш ўртоғи, 1987 йилда туғилган Абдураҳмон Ўразов А.Р. вақтинча яшаётган, Самарқанд шаҳар, Мирзо Улуғбек кўчасидаги хонадонга келгани маълум бўлди.
Икковлон ҳеч бир сабабсиз жабрдийданинг юз ва бош қисмига қўллари билан уриб жароҳат етказиб, iPhone 5S мобил телефони ва пуллари, ҳисобида маблағлари бўлган банк карточкаларини олиб, ўзини йўловчи такси автомашинасига ўтказиб, Тошкент шаҳрига жўнатиб юбориб, ўзлари воқеа жойидан яширингани аниқланди.
Александра Безпятова ва Абдураҳмон Ўрозовни ушлаш чоралари кўрилган. Улар ҳақида маълумотга эга бўлганлардан ҳудудий ички ишлар бўлимларига мурожат этиши ёки 102 рақамига қўнғироқ қилиши сўралган.
Изоҳ (0)