Ўзбекистон ҳукумати, «Росатом» корпорацияси ва Атом энергетикаси халқаро агентлиги (МАГАТЕ) атом электростанциясини лойиҳалаштириш, қуриш ва ундан фойдаланиш бўйича келишув устида иш олиб бормоқда. Бу ҳақда «Ўзбекэнерго» компаниясининг стратегик ривожлантириш бошқармаси бошлиғи Эсо Саъдуллаев маълум қилди, дея хабар беради «Газета.uz».
АЭС қуввати 1200 мегаватт бўлган иккита энергоблокка эга бўлиб, умумий қуввати 2400 мегаватт бўлиши кутилмоқда. Станция қуриладиган жой кейинроқ маълум қилинади. «Ўзбекэнерго» вакили бутун мамлакат бўйлаб 10 га яқин майдон кўриб чиқилаётганини айтди. Иқтисодий жиҳатдан ва электр энергиясига эҳтиёж катталиги нуқтаи назаридан манфаатли жой танлаб олинади.
— Ҳозирда АЭС қуриладиган майдон бўйича текширувлар ўтказилмоқда. Биз энерготизимнинг марказий қисми (Тошкент қисми), шарқий қисми (Фарғона водийси), Самарқанд-Бухоро қисми, Сурхондарё қисмида (жанубий ҳудудлар) қуришни кўриб чиқмоқдамиз. Аслини олганда барча ҳудудларда АЭС қурилиши бўйича техник имкониятлар мавжуд, бироқ майдончани, шу жумладан муҳандислик иншоотларини диққат билан ўрганиш, табиий газ, электр тармоқлари, темир йўл ва бошқалар бўлиши лозим, — дея аниқлик киритди Эсо Саъдуллаев.
Лойиҳа қиймати ҳозирча ошкор қилингани йўқ, чунки якуний қарор ҳали қабул қилинмади. Бироқ «Ўзбекэнерго» вакилининг қайд этишича, жаҳон тажрибаси иккита «уч плюс» замонавий авлод энергоблокли АЭС қурилиши 10 миллиард доллар атрофида тушади. Молиялаштириш манбалари Россия томонидан билан биргаликда кўриб чиқилмоқда.
Лойиҳани амалга ошириш муддатлари ҳам ҳозирча номаълум, бироқ Эсо Саъдуллаевнинг сўзларига кўра, одатда қурилиш беш йил муддатни ўз ичига олади. Шундан сўнг икки йил давомида АЭС «Росатом» ва МАГАТЕ мутахассислари назорати остида ишлайди.
«Биз истиқболда углеводород ёқилғига кучли қарамликдан қочиш, аҳоли ва иқтисодиёт соҳаларини арзон электр энергияси билан таъминлаш учун қадамларни ташламоқдамиз, 2030 йилга қадар электр энергиясига бўлган талабнинг бугунги кунга қараганда икки баробар ошиши тахмин қилинмоқда», — деди «Ўзбекэнерго» вакили.
Изоҳ (0)