АҚШ ҳарбий-ҳаво кучларининг A-29 Super Tucano штурмчи самолёти Нью-Мексико штатида ўқув парвози вақтида ҳалокатга учради. Бу ҳақда Холломан авиабазасининг маълумотига таяниб, «Газета.ru» хабар бермоқда.
Ҳалокат 22 июнь, жума куни эрталаб Холломан ҳарбий базасидан 100 километр узоқликда юз берган. Самолёт бортида 2 нафар учувчи бўлган, улардан бири енгил жароҳат олган. Иккинчи учувчи ҳақида ҳозирча ҳеч қандай маълумот тақдим қилинмаган.
«Айни пайтда воқеа тафсилотлари ўрганилмоқда, ҳозирча ҳалокат сабаблари аниқланмаган», — дейилади ҳарбий база хабарида.
Маълум қилинишича, навбатдаги режалаштирилган ўқув парвози бекор қилинган.
Аввалроқ АҚШда 2 та енгил моторли самолёт тўқнашиб кетгани ҳақида хабар қилинган эди.
Изоҳ (0)