Оқ йўлбарс, эчки, маймун, фил, акула. Россиядаги Жаҳон Чемпионатининг башоратчи ҳайвонлари (фотогалерея)
2010 йил Жанубий Африка Республикасида ўтган Жаҳон Чемпионатида немис саккизоёғи Паул мундиал ўйинлари натижасини олдиндан топиб мухлислар эътирофига сазовор бўлган эди. Энди эса Россияда ЖЧ—2018 давом этаётган бир паллада бутун дунё бўйлаб футбол мухлислари Паулнинг «издошлар»ини қидиришда давом этмоқда. «Интерфакс» нашри эса Россиядаги мундиалнинг «башоратчи» ҳайвонларини бир саҳифага тўплаб тақдим этди.
Бенгал оқ йўлбарси — лақаби Хон
Йўлбарс Россиянинг Миср устидан ғалабасини тахмин қилган эди. Буни қарангки, унинг башорати тўғри чиқди.
Мушук — Ахилл
Эрмитажлик Ахилл лақабли мушук ҳам Россиянинг Миср устидан ғалабасини тахмин этганди.
Эчки — лақаби Забияка
Самарадаги эчки 21 июнь куни «Самара Арена»даб бўлиб ўтадиган Дания—Австралия учрашувида дуранг натижаси қайд этилишини тахмин қилди. Кўрамиз, унинг тахмини ўзини оқлармикан.
Маймун
Загребдаги Гиббонлар оиласига мансуб маймун Хорватиянинг Нигерияга қарши ўйинда ғалаба қозонишини тахмин қилганди. Унинг башорати ўзини оқлади. Хорватия 2:0 ҳисобида ғалаба қозонди.
Денгиз мушуги — лақаби Дейзи
Ростокдаги денгиз мушуги Германиянинг Мексикага мағлуб бўлишини тахмин этганди. Дейзининг топқирлигига гап йўқ. Мексика амалдаги Жаҳон чемпионини 1:0 ҳисобида мағлуб этди.
Фил — лақаби Зелла
Штутгарт ҳайвонот боғидаги Зелла Сенегалнинг мундиалда чемпион бўлишини тахмин этди. Кеча эса Сенегал 1-тур доирасида Польшани мағлуб этди.
Акула
Таиланднинг Чиангмае шаҳридаги ҳайвонот боғидаги акула эса ўзидан башоратчи чиқмаслигини биринчи турдаёқ кўрсатиб қўйганди. Жумладан, акула Саудия Арабистонини Россия устидан ғалаба қозонишини тахмин этганди. Якунда Россия арабларни 5:0 ҳисобида мағлуб этди.
