Россиялик ва швейцариялик олимлар сунъий йўлдошни лазерли учириш усули устида ишламоқда

Россиянинг «Галактика» компанияси Швейцариянинг Dltech университети билан ҳамкорликда сунъий йўлдошларни орбитага лазер «замбараги» ёрдамида учириш концепциясини ишлаб чиқмоқда. Бу ҳақда «РИА Новости» хабар берди.

Lightcraft номли худди шундай лойиҳа АҚШда 1970 йиллардан яратила бошланган. Иш принципи энергияни лазерли нурланиш ёрдамида фойдали юкни космосга олиб чиқувчи аппаратга узатишга асосланган. Нур космик аппарат олдидаги ҳавони плазмага айлантиради. Кема эса ўта юқори ўтказувчан магнит ҳисобига ҳавони пастга итаради. 1990—2000 йилларда ўтказилган тажрибалар доирасида нишонни 30 метрга, кейин эса 70 метрга кўтаришга муваффақ бўлинган.

Лазер «замбараги» сифатида Dltech университетида яратилган қуввати 300 киловатт бўлган лазердан фойдаланиш режалаштирилмоқда. Бироқ 100 килограмм фойдали юкни олиб чиқиш учун 40 мегаватт қувватли лазер керак бўлади, у эса институт мутахассислари томонидан яратилмоқда.

Муаллифлар фикрига кўра, бундай тизимнинг яратилиши юкларни орбитага олиб чиқиш харажатларини 10—100 мартагача, бир килограмм юк учун эса 500 долларгача камайтириш имконини беради.

«Галактика»нинг ҳисоб-китобига кўра, лойиҳани беш йил ичида амалга ошириш, ундан кейин эса тижорий фойдаланишга ўтиш мумкин. Лойиҳанинг умумий қиймати 107 миллиард долларга баҳоланмоқда.