Rossiyaning “Galaktika” kompaniyasi Shveysariyaning Dltech universiteti bilan hamkorlikda sun’iy yo‘ldoshlarni orbitaga lazer “zambaragi” yordamida uchirish konsepsiyasini ishlab chiqmoqda. Bu haqda “RIA Novosti” xabar berdi.
Lightcraft nomli xuddi shunday loyiha AQShda 1970-yillardan yaratila boshlangan. Ish prinsipi energiyani lazerli nurlanish yordamida foydali yukni kosmosga olib chiquvchi apparatga uzatishga asoslangan. Nur kosmik apparat oldidagi havoni plazmaga aylantiradi. Kema esa o‘ta yuqori o‘tkazuvchan magnit hisobiga havoni pastga itaradi. 1990—2000-yillarda o‘tkazilgan tajribalar doirasida nishonni 30 metrga, keyin esa 70 metrga ko‘tarishga muvaffaq bo‘lingan.
Lazer “zambaragi” sifatida Dltech universitetida yaratilgan quvvati 300 kilovatt bo‘lgan lazerdan foydalanish rejalashtirilmoqda. Biroq 100 kilogramm foydali yukni olib chiqish uchun 40 megavatt quvvatli lazer kerak bo‘ladi, u esa institut mutaxassislari tomonidan yaratilmoqda.
Mualliflar fikriga ko‘ra, bunday tizimning yaratilishi yuklarni orbitaga olib chiqish xarajatlarini 10—100 martagacha, bir kilogramm yuk uchun esa 500 dollargacha kamaytirish imkonini beradi.
“Galaktika”ning hisob-kitobiga ko‘ra, loyihani besh yil ichida amalga oshirish, undan keyin esa tijoriy foydalanishga o‘tish mumkin. Loyihaning umumiy qiymati 107 milliard dollarga baholanmoqda.
Izoh (0)