Итлар ёғли гўштни маъқул кўради, мушуклар эса ширинроқ овқатларни ёқтиради, бунда иккала ҳайвон ҳам оқсилларни камроқ калория берувчи деб ҳисоблайди. Бу ҳақда Journal of Experimental Biology журналига таяниб, «РИА Новости» хабар берди.
Мушук ва итларнинг эгаларини нима учун ҳайвонлари баъзи овқат турларини жуда ёқтириши, бошқаларидан эса бош тортиши қизиқтириб келади.
АҚШнинг Орегон штати олимлари бу саволга жавоб топишга уриниб кўрди. Улар ветеринарлар томонидан лабораторияда тайёрланган тажриба овқатларининг «дегустаторлари» бўлган ўттизтача ит ва мушукни кузатган.
Тажриба учун биологлар бир хил таъм, ҳид ва кўринишга, бироқ оқсил, ёғ ва углеводларнинг турли миқдорига эга бўлган бир неча хил ит ва мушуклар овқатини тайёрлаган. Бу «овқатлар»нинг ҳар биридан солинган идишлар ҳайвонлар олдига қўйилган ва ҳар бир идишдан хоҳлаганча ейишга имкон берилган.
Ҳайвонлар кераклича калорияни олгач, идишлар олиб қўйилган ва кейинги овқатланиш сеансида идишларга қайтадан овқат тўлдириб, улар тасодифий тартибда жойлаштирилган. Шу тариқа олимлар жамоаси одатлар ва хотира таъсирини нейтраллаштириб, қайси моддалар ҳайвонларга кўпроқ ёқишини аниқлашга ҳаракат қилган.
Мушуклар ширин овқат таъмини сеза олмаса ҳам, уларга кўпроқ углеводли овқатлар маъқул келган — улар бундай овқатларни 43 фоиз ҳолатда танлаган. Иккинчи ўриндан ёғ жой олган. Мушукларнинг «анъанавий» овқати ҳисобланган оқсиллар уларга энг кам маъқул бўлган.
Итлар эса кўпроқ ёғли овқатларни маъқул кўрган, «гўштсиз» овқатлар улар учун энг охирги ўриндан жой олган. Ҳеч бир ҳайвон оқсилларни асосий калория манбаи сифатида танламаган.
Изоҳ (0)