Тошкент шаҳридаги «Халқлар дўстлиги» саройида ташкил этилган «Унутмоқ осонмас» хотира дастури туркумидаги мусиқий кеча адабиёт намояндалари, кинематография, сухандонлик санъати, мумтоз қўшиқчилик ва эстрада ривожи йўлида салмоқли меҳнат қилган санъаткорлар ёдига бағишланди. Бу ҳақда ЎзА хабар берди.
Чорлов мусиқаси янграйди. Саҳнага ўрнатилган улкан экран орқали намойиш этилаётган видеолавҳаларда умрини маънавият, адабиёт, санъатнинг гуллаб-яшнашига бағишлаган инсонларнинг сиймоси гавдаланади. Миллий адабиётни Ўзбекистон қаҳрамонлари Эркин Воҳидов ва Абдулла Орипов ижодисиз тасаввур этиш мушкул. Уларнинг шеърлари кириб бормаган хонадонни топиш мушкул.
Моҳир режиссёр, санъат арбоби Шуҳрат Аббосовнинг фильмлари мамлакат ва хорижда ҳам шуҳрат қозонган. Ўзбекистон халқ артисти Ўлмас Алихўжаев ижро этган роллари миллий руҳи, бетакрорлиги билан мухлислар қалбдан ўрин олган. Таниқли хонандалар Олмахон Ҳайитова, Камолиддин Раҳимов, Фахриддин Умаров мусиқа санъатимиз йўлида самарали меҳнат қилган бўлса, Насиба Мақсудова, Абдумўмин Ўтбосаров, Дилдора Қаюмова сингари таниқли сухандонлар она тилининг, сўзнинг қадр-қимматини баланд билган, касбига садоқатли ижодкорлар эди.
Мусиқий кечада одамийликни, самимий ва умрбоқий эзгу туйғуларни тараннум этувчи куй-қўшиқлар ижро этилди.
Изоҳ (0)