Ўзбекистонда дориларни интернет орқали сотиш тартиби лойиҳаси тайёрланди
Май ойи бошида Ўзбекистон президенти электрон тижорат тўғрисидаги қарорни имзолаган, унда дорилар ва тиббиёт буюмларини онлайн сотиш мумкинлиги айтилган эди, деб ёзади Spot. Шу муносабат билан Дори воситалари ва тиббий техника сифатини назорат қилиш бош бошқармаси «Электрон тижорат орқали дори воситалари ва тиббий буюмларни реализация қилиш тартиби» лойиҳасини тайёрлади.
Лойиҳага кўра, электрон тижорат орқали реализация қилинган дори воситалари ва тиббий буюмлар фармацевтика фаолиятини амалга ошириш учун тегишли лицензияга эга бўлган юридик шахслар томонидан махсус ихтисослаштирилган автотранспорт воситалари орқали етказиб берилади.
Шунингдек, қайд этилишича, фармацевтика фаолиятини амалга ошириш учун тегишли лицензияга эга бўлган юридик шахслар махсус ихтисослаштирилган автотранспорт воситаларида дори воситалари ва тиббий буюмларни етказиб беришда шаҳар, шаҳар атрофи, шаҳарлараро ва халқаро автомобилда йўловчилар ва юк ташишларни амалга ошириш учун лицензия олиш талаб қилинмайди.
Дорихоналар томонидан электрон тижорат орқали фақат рецептсиз бериладиган дори воситалари, тиббий буюмлар, биологик фаол қўшимчалар ҳамда косметика ва шахсий гигиена воситаларини чакана реализациясини амалга оширишга рухсат бериш таклиф қилинмоқда.
Харидорлар ҳам жисмоний, ҳам юридик шахс бўлиши мумкин. Савдо майдончаси сифатида сайт ёки мобил дастурдан фойдаланиш мумкин. Таъкидланишича, серверлар мамлакат ҳудудида жойлашган бўлиши шарт.
Шартнома оферта ва акцептдан иборат бўлади.
