Беларуснинг «БелАЗ» холдинги 2020—2023 йилларда Ўзбекистонга самосваллар етказиб беради, деб хабар беради Sputnik.
Компания бош директори Петр Пархомчикнинг маълум қилишича, 2017—2018 йиллар учун 260 дона оғир карер самосваллари етказиб бериш бўйича шартнома имзоланган бўлиб, шартнома 70 фоизга бажарилди.
Беларусь ўтган йили Ўзбекистонга 106 техника етказиб берган бўлса, жорий йилнинг январидан май ойига қадар 64 дона техника етказилди.
Июнь ойида Ўзбекистонга Беларусь делегацияси ташриф буюрди. Беларусь бош вазири Андрей Кобяков ўзаро савдо ҳажмини оширишни таклиф қилди ва икки мамлакат иқтисодий салоҳиятини юқори баҳолади.
Минск Тошкент билан пахта толаси, янги ва қайта ишланган мева-сабзавотлар, ёнғоқ, сут, гўшт маҳсулотлари етказиб беришга келишиб олди.
Бундан ташқари, мамлакатлар ҳамкорликда фармацевтика ва қандолат корхоналари очишни режалаштирмоқда.
Шу йилнинг сентябрь ойида Беларусь президенти Александр Лукашенко Ўзбекистонга ташриф буюради.
Изоҳ (0)