Жаҳон Чемпионати бошланишига 1 кун қолганда Хулен Лопетеги Испания терма жамоасидан ҳайдалди

Кеча, 12 июнь санасида Испания терма жамоаси бош мураббийи Хулен Лопетеги Мадриднинг «Реал» жамоасига бош мураббий этиб тайинланган эди.

Бугун эса у Жаҳон Чемпионатига бир кун қолганда Испания терма жамоаси мураббийлигидан озод этилди. Бу ҳақда Испания футбол федерацияси президенти Луис Рубиалес маълум қилди, деб ёзади «Sports.ru».

«Биз бош мураббийнинг хизматидан воз кечишга мажбур бўлдик. Унга омад тилаймиз. Испания термасида умумий ўрнатилган одоб қоидалари бор эканлигини ҳамма ходимлар билиши керак. Бу хиёнат эмас. Муаммо шундаки, «Реал» билан музокаралар федерацияни хабардор қилмасдан олиб борилган. Биз буни эътиборсиз қолдиришимиз мумкин эмасди. Лопетеги шак-шубҳасиз ҳақиқий профессионал. Бироқ ишни қоидаларга қараб олиб бориш керак», — деди Рубиалес.

Қайд этилишича, терма жамоа сардори Серхио Рамос бошчилигидаги футболчилар мураббийни олиб қолишни сўраган бироқ бу рад этилган.