АҚШда оддий мактабда ўқиб миллиардер бўлганлар рўйхати тақдим қилинди

CNBC оддий мактабларни тамомлаган миллиардерлар рўйхатини тақдим қилди, деб ёзмоқда Forum Daily.

Кўпчилик муваффақият ва катта даромадларнинг сири хусусий мактаблар ва нуфузли коллежларда таълим олиш билан боғлиқ, деб ҳисоблайди. Кўп ҳолатларда шундай бўлади ҳам, аммо бир қанча кишиларни мисол келтириш мумкинки, улар оддий мактабларни тамомлаб катта муваффақиятларга эришган.

Уоррен Баффет

• Бойлиги: 84 миллиард доллар
• Таълим: давлат мактаби ва коллеж

Баффет болалиги ва ўсмирлигининг асосий қисмини Вашингтонда ўтказган. Унинг отаси республикачилар партиясидан конгрессменликка сайланган.

Мактабда таҳсил олиш вақтларидаёқ Баффет пул топишни бошлаган — Coca-Cola ва сақич сотган. Шунингдек, у дарсга боришдан олдин газета тарқатган. Бу ишни у юқори синфга ўтганида ҳам давом эттирган. Мактабни Баффет 1947 йили тамомлаган.

17 ёшида Баффет коллежга киришдан бош тортган. «Коллежга киришдан маъно бор эдими? Мен бу иш билан шуғулланишни истамаганман. Мен етарлича пул топишни бошлагандим, коллеж эса менинг вақтимни ўғирлаган бўлар эди», — дейди миллиардер.

Шунга қарамасдан, у отасини хотиржам қилиш учун Уортон коллежидаги дарсларга бориб туради. Бироқ Баффет учун коллежга бориш зерикарли эди. У тез орада Линкольндаги Небраска университетига ўтиб кетади ва 1950 йили тамомлайди.

Чарли Мунгер

• Бойлиги: 1,68 миллиард доллар
• Таълим: давлат мактаби ва коллеж

Баффетнинг ҳамкори ва Беркшире холдинги раисининг ўринбосари Чарли Мунгер оддий мактабда таҳсил олган. Мактабда у кўплаб тўгарак ва клубларнинг аъзоси бўлган. Мунгер Мичиган университетида таҳсил олган, кейинчалик Калифорния технологиялар университетига ўтиб кетган. Бироқ Мунгер университетни тамомламаган ва диплом олмаган.

Опра Уинфри

• Бойлиги: 3 миллиард доллар
• Таълим: давлат мактаби ва коллеж

Медиа-магнат Опра Уинфри болалик ва ўсмирлик вақтида жуда кўп кўчишига тўғри келган. Шунинг учун у бир қанча мактабларни алмаштирган. Бу муассасаларнинг барчаси давлат мактаблари эди. У юқори синфларда айниқса катта муваффақиятларга эришган, энг яхши ўқувчилар рўйхатига киритилган ва талабалар бошқаруви аъзоси бўлган. 17 ёшида Опра афроамерикаликлар ўртасида ўтказилган «Мисс Теннесси» гўзаллик танловида ғолибликни қўлга киритган. Танловдан кейин маҳаллий  WVOL радиостанцияси унга иш таклиф қилган.

1971 йили мактабни тамомлаган Уинфри Теннесси университетига тўлиқ стипендия асосида ўқишга қабул қилинган.

Стив Жобс

• Бойлиги: 20,1 миллиард доллар
• Таълим: давлат мактаби

Apple’нинг марҳум асосчиси Стив Жобс 1972 йили Калифорния штатидаги мактабни тамомлаган. Унинг бўлажак бизнес ҳамкори, Apple’га асос солган кишилардан бири Стив Возняк худди шу мактабни бир неча йил эртароқ тамомлаган. Жобс ҳеч қачон яхши ўқувчи бўлмаган. Бундан ташқари, у хусусий коллеждаги ўқишни ташлаб кетган ва диплом олмаган.

Жефф Безос

• Бойлиги: 138,8 миллиард доллар
• Таълим: давлат мактаби, Пристон университети

Amazon’нинг бош директори ва дунёдаги энг бадавлат одам Жефф Безос Майамидаги мактабни 1982 йили битирган. Безос мактабда аълочи бўлган. 1986 йили Пристон хусусий университетини тамомлаган.

Сара Блейкли

• Бойлиги: 1,11 миллиард доллар
• Таълим: давлат мактаби, коллеж

Спанх асосчиси Сара Блейкли ўзи туғилиб ўсган Флорида штатидаги мактабни тамомлаган. У ўсмирлигидаёқ тадбиркорлик қилишни бошлаган. Сара пляжларда ота-оналар дам олгунча уларнинг болаларига қараб турадиган энага бўлиб пул топган. Блейкли Флорида университетида таҳсил олган. 2012 йили у энг ёш сэлф-мейд (мустақил равишда шу даражага эришган) миллиардер аёл сифатида Forbes журнали рўйхатига киритилган.

Ларри Пейж

• Бойлиги: 52,2 миллиард доллар
• Таълим: давлат мактаби, коллеж

Alphabet компаниясининг бош ижрочи директори ва Google’нинг асосчиси Ларри Пейж 1991 йили ўрта мактабни тамомлаган. Кейинчалик Мичиган университетида электротехника бўйича таҳсил олган.

Ларрининг ота-онаси информатика бўйича таълим олган ва шу соҳада ишлаган. Унинг сўзларига қараганда, ота-онаси уни ҳеч қачон информатика йўналишини танлашга мажбур қилмаган, бу Ларрининг мустақил танлови бўлган.

Мэг Уитмен

• Бойлиги: 3,4 миллиард доллар
• Таълим: давлат мактаби, Пристон университети

HP ҳамда eBay’нинг собиқ бош директори Мэг Уитмен Нью-Йоркда туғилиб ўсган. 1974 йили ўрта мактабни тамомлаган. Мег мактабда яхши баҳоларга ўқиган, ўт устидаги хоккей, теннис ва баскетбол билан шуғулланган. У Пристон хусусий университетини тамомлаган. Уитмен АҚШдаги 2 та энг йирик давлат корхонасига раҳбарлик қилган ягона аёл сифатида танилган.