Ўзбекистон ташқи савдо айланмаси 2018 йил январь—май ойларида 14,7 миллиард АҚШ доллари, шу жумладан, экспорт 6,5 миллиард АҚШ доллари ва импорт 8,2 миллиард АҚШ долларини ташкил қилди. Ташқи савдо айланмаси сальдоси минус 1,7 миллиард АҚШ долларини ташкил этди. Бу ҳақда Ўзбекистон Республикаси Давлат статистика қўмитаси матбуот хизмати хабар берди.
Экспорт таркибида энергия манбалари ва нефть маҳсулотлари ўтган йилнинг шу даврига нисбатан 64,3 фоизга ўсиши табиий газнинг 1,8 мартага ошгани ҳисобига тўғри келмоқда. Кимё маҳсулотлари ва ундан тайёрланган буюмлар эса 2,6 фоизга ўсди, шундан пластмасса ва пластмасса буюмларининг экспорти 18,5 фоизга ошди. Мева-сабзавот маҳсулотлари экспортининг ўтган йилнинг шу даврига нисбатан 73,8 фоизга ўсиши озиқ-овқат маҳсулотлари экспорти ҳажмининг 60,9 фоизга ўсишига олиб келди.
Импорт таркибида асосий улуш машина ва асбоб-ускуналар (умумий импорт ҳажмида 33,7 фоиз) ва кимё маҳсулотлари ва ундан тайёрланган буюмлар (11,5 фоиз) ҳисобига тўғри келмоқда.
Экспорт таркибининг умумий ҳажмидан 29,8 фоизини хизматлар ташкил қилади, бунда транспорт хизматлари 10,4 фоиз ва сафарлар 17,6 фоизни ташкил қилади.
МДҲ давлатлари орасида Россия, Қозоғистон, Беларусь, Украина, Қирғизистон ва Тожикистон давлатлари ташқи савдо айланмасида асосий ҳамкорлар ҳисобланиб, уларнинг жами ташқи савдо айланмасидаги улуши 27,5 фоизни ташкил қилди, бошқа давлатлар орасида Хитой, Туркия, Корея Республикаси, Афғонистон, Германия, Латвия, Эрон, Франция давлатлари ҳисобланиб, уларнинг улуши 32,1 фоизни ташкил қилмоқда.
Мева-сабзавот маҳсулотлари экспорт ҳажми 305,4 миллион АҚШ долларини ташкил қилди, ёки ўтган йилнинг шу даврига нисбатан 73,8 фоизга ошди. Мева-сабзавот маҳсулотлари экспорт ҳажмида 40,6 фоизини мева ва резаворлар (ўтган йилнинг шу даврига нисбатан 2,2 мартага ўсди), 49,0 фоизини сабзавотлар (58,9 фоизига), 7,5 фоизини узум (0,4 фоизга камайди) ташкил қилади. Мева-сабзавот маҳсулотлари экспортида асосий ҳамкор давлатлар Қозоғистон (умумий ҳажмдан 47,4 фоиз ), Россия (13,4 фоиз), Афғонистон (7,7 фоиз), Қирғизистон (7,3 фоиз), Хитой (4,7 фоиз), Вьетнам (4,4 фоиз), Туркия (3,0 фоиз), Покистон (2,0 фоиз) ва Эрон (1,3 фоиз) ҳисобланади.
2018 йил январь—май ойлари якуни бўйича тўқимачилик маҳсулотлари экспорти умумий экспорт ҳажмида 8,3 фоизни ташкил қилди. Тўқимачилик маҳсулотлари экспорт ҳажми 536,5 миллион АҚШ долларини ташкил қилди ёки ўтган йилнинг шу даврига нисбатан 15,3 фоизга ошди.
Изоҳ (0)