Янгиқўрғон туманида 1 июнь — Халқаро болаларни ҳимоя қилиш кунидаги тадбирлар Ўзбекистондаги энг катта мусиқий фавворалардан бири жойлашган «Эко-парк» ҳудудида бошланди. Бу ерда тумандаги мактабгача таълим муассасалари тарбияланувчилари томонидан тайёрланган буюмлар кўргазмаси ташкил этилди, дея хабар беради туман ҳокимлиги ахборот хизмати.
Боғ майдонида «Эртаклар оламига сайёҳат» шиори остида эртаклар, қўғирчоқ театридан кўринишлар саҳналаштирилди. Асфальтда чизилган расмлар кўрик-танлови ўтказилди.
Шундан сўнг туман маданият бўлими томонидан тайёрланган байрам концерти бошланди. Унда боғча тарбияланувчилари томонидан «Товус», «Ўзбек боласи», «Матрёшкалар», «Қўғирчоқ», «Жоду» деб номланган, шунингдек, ҳиндча, грузинча, италянча рақслар ижро этилди. 3-MTMнинг жажжи гимнастикачи қизлари даврадагиларни абжирлиги билан лол қолдирди.
Туман адлия бўлими томонидан бола ҳуқуқлари содда тилда ва суратлар билан акс эттирилган флаерлар тарқатилди. Болалар ҳомийлар томонидан музқаймоқ билан сийланди.
17-болалар мусиқа ва санъат мактабига тумандаги умумтаълим мактаблари ўқувчилари — ногиронлиги бўлган, кам таъминланган оилаларнинг 80 нафардан ортиқ фарзанди таклиф этилди. Бу ерда уларнинг ҳар бирига таълим ходимлари касаба уюшмаси томонидан тайёрланган ўқув қуроллари тўпламидан иборат совғалар берилди. Улар учун концерт дастури уюштирилиб, байрам дастурхони ёзилди.
Байрам кунлари тумандаги 20- ва 37-ихтисослаштирилган махсус мактабгача таълим муассасалари тарбияланувчилари ҳам йўқланиб, уларга ўйинчоқлар тарқатилди, туман маданият бўлими санъаткорлари томонидан концертлар уюштирилди.
Изоҳ (0)