Ўзбекистон футбол ассоциацияси ва «Реал Мадрид» клуби академияси ўртасидаги келишувга асосан 22—23 май кунлари «Қироллик клуби» академияси менежерлари Андрес Антонио ҳамда Хуан Пабло Тошкентга келиб, Ўзбекистонда Real Madrid Foundation Clinic дастурини ишга тушириш бўйича дастлабки ҳаракатлар бошланганди.
Ана шу дастурга асосан, бугун, 31 май куни «Қироллик клуби»нинг 3 нафар мураббийи — Карлос Альберт, Мануэль Агуадо Хил ва Эктор Висенте Тошкентга етиб келди. Бу ҳақда ЎФА маълум қилди.
Мураббийлар ЎФА вакиллари, футбол ишқибозлари ҳамда ОАВ ходимлари томонидан катта тантаналар билан кутиб олинди.
Таъкидлаш лозим, Карлос Альберт 2008—2015 йиллар давомида «Реал Мадрид» нинг асосий жамоасида дарвозабонлар мураббийи сифатида фаолият юритган ва Икер Касильясга устозлик қилган. Ҳозирда у «Реал Мадрид» клубида методист сифатида иш олиб боради.
Испаниялик мутахассислар Ўзбекистондаги болаларга 16 июнга қадар футбол бўйича мастер-класслар ўтказади.
2004 ва 2008 йиллар оралиғида таваллуд топган 300 нафар тарбияланувчи иштирокида мастер класс тадбири 2 қисмдан иборат бўлади. Даставвал 4—9 июнь кунлари 2006—2008 йиллар оралиғида туғилган футболчилар ўртасида, кейин эса 11—16 июнь кунлари 2004 ҳамда 2005 йилда таваллуд топган футболчилар учун ўтказилади.
Ҳар бир вилоятнинг аҳолиси сонидан келиб чиқиб, ЎФА ҳудудий федерацияларга ўз квоталарини ажратган. ЎФА билан келишган ҳолда, Тошкент шаҳар футбол федерацияси 2006—2007 йилларда таваллуд топган футболчилар учун ажратилган квоталарини жаҳон чемпиони бўлган меҳрибонлик уйи тарбияланувчиларига берадиган бўлди.
Шу билан бир қаторда Азамат Абдураимов бошчилик қилаётган Ўзбекистон ўсмирлар терма жамоаси ҳам «Реал Мадрид» клуби академиясининг тадбирида иштирок этади.
«Реал Мадрид» иштирокидаги иккинчи тадбир куз фаслида бўлиб ўтади. ЎФА ва «Қироллик клуби» ўртасидаги келишувга биноан кейинги мастер класс тадбирини вилоятларда ўтказиш режалаштирилган.
Изоҳ (0)