Ўзбекистондаги меҳрибонлик уйлари ва интернатлларида болаларнинг ярмидан кўпроғи ушбу муассасаларга оилаларидаги ижтимоий ва молиявий қийинчиликлар туфайли тушиб қолган. Бу ҳақда Тошкентда Халқ таълими вазирлиги, «Оила» илмий-амалий тадқиқот маркази ва БМТ болалар фонди — ЮНИСЕФ вакиллари иштирокида ўтган йиғилишда айтилди, деб хабар беради «Газета.uz».
Айтилишича, бу болаларнинг аксарияти ота-оналарга эга, аммо қийинчиликлар туфайли давлат қарамоғига топширилган. Мутахассислар уларни оилаларига қайтариш лозимлигини таъкидлаб ўтди.
ЮНИСЕФ ваколатхонаси раҳбари Саша Грауманн болаларга васийлик қилиш тизимини ислоҳ қилиш бўйича ўз тавсияларини бериб ўтди. Бу тавсияларда, жумладан, болаларни бундай муассасаларга ижтимоий-молиявий сабабларга кўра жойлаштиришни тўхтатиш ҳамда оилавий васийликнинг муқобил шаклларини (боқиб олаб, оталиққа олиш ва ҳ.к.) кенг ёйиш лозимлиги айтиб ўтилган.
Изоҳ (0)