Ўзбекистон соғлиқни сақлаш вазири Алишер Шодмонов АҚШнинг етакчи клиникаларидан бири — Сент-Луис университетининг ортопедик жарроҳлик департаменти раҳбари, таниқли мутахассис Жолдас Қулжонов билан учрашди. Бу ҳақда Соғлиқни сақлаш вазирлиги матбуот хизмати хабар берди.
Жолдас Қулжонов асли нукуслик бўлиб, 1989 йилгача Никарагуада ишлаган. Шунингдек, «Пахтакор» футбол клуби шифокори сифатида фаолият юритган. 1989—1995 йилларда Тошкент тиббиёт академияси 2-клиникасининг травматология ва ортопедия бўлими раҳбари бўлган. Ҳозирда травматолог-ортопед Жолдас Қулжонов АҚШда фаолият кўрсатмоқда.
Қулжонов АҚШда ҳар йили 700 дан зиёд энг мураккаб операцияларни муваффақиятли ўтказади, университет клиникасида қатор давлатларнинг травматолог-ортопедларига таълим беради, дунёнинг нуфузли тиббиёт марказларида маҳорат дарслари олиб боради.
Жолдас Қулжонов беш маротаба АҚШда йилнинг энг яхши шифокорларидан бири сифатида эътироф этилган.
Учрашув чоғида Қулжонов 23 июнь—3 июль кунлари Сент-Луис ва Сан-Диегодаги ихтисослаштирилган тиббиёт марказларининг нейрохирург, нейрофизиолог, уролог, травматолог-ортопед ва бошқа шифокорлари Ўзбекистонга ташриф буюришини маълум қилди.
Изоҳ (0)