Фарғона олимпия захиралари коллежида Давлат тест маркази томонидан олий таълим муассасалари бакалавриатига кириш имтиҳонларига тайёргарлик кўриш мақсадида тест синовлари репетицияси ўтказилди. Унда Тошкент ахборот технологиялари университети Фарғона филиали қошидаги академик лицейнинг 240 нафар ўқувчиси абитуриент сифатида қатнашди. Бу ҳақда «Дарё» мухбири хабар берди.
Ўқувчиларнинг ҳар бири шахсни идентификациялаш ва аниқлаш видеокузатув мосламалари ҳамда металлодетекторлар орқали текширувдан ўтказилди. Тест синовлари репетицияси давомида 4 та кузатув камералари ишлаб турди. Maxсус уюштирилиб, опасининг ўрнига имтиҳонга кирмоқчи бўлган «абитуриент»нинг юзини қурилма таниб олди ва синовга киришига йўл бермади.
Рўмолчаси, соати ёрдамида шпаргалкадан фойдаланмоқчи бўлган, телефон орқали тест ечишга ҳаракат қилган «абитуриент»ларни йўналтириладиган ва таҳлил қиладиган камера бир зумда аниқлаб берди.
—Тест синовларининг адолатли, холис ва шаффоф ўтишини таъминлаш мақсадида бу каби видеокузатув мосламалари, камера ва жиҳозлар учун давлат томонидан 8,6 миллиард сўм маблағ ажратилди. Бугунги репетиция жараёнида абитуриентлар тест синовларида ёлғон ишлата олмасликлари, шпаргалка ва телефон билан албатта қўлга тушишларини ўз кўзлари билан кўрди ва ҳақиқий синовда бундай ҳолларга йўл қўймаслик кераклигини билиб олди. Ота-оналар фарзандининг қандай тест ечаётганлигини онлайн тарзда экранда кузатиш имкониятига эга бўлди, — дейди Давлат тест марказининг Фарғона вилояти бўлими бошлиғи Исмоилхон Шокиров.
«Имтиҳон» жараёнида 270 нафардан ортиқ назоратчи амалий машғулотларни ўтди, ота-оналар ҳам бу йилги тест синовларининг янги тартиби ҳақида тушунчага эга бўлиш учун кузатувчи сифатида таклиф қилинди.
Маълумот учун, бу йил Фарғона вилоятида 800 нафардан ортиқ олий таълим муассасаларининг профессор-ўқитувчилари ҳамда халқ таълими бўлими ходимлари назоратчи сифатида тест синовларига жалб этилиши режалаштирилган.
Изоҳ (0)