UzCard SMS-хабарнома хизматини масофадан ўчириш бўйича Stop1 хизмати ҳақида гапириб берди.
«Сўнгги пайтларда карталаримиз эгалари ижтимоий тармоқлар орқали мобил дастурларга уланган телефон рақамини қандай узиш мумкинлиги тўғрисида қизиқиб, қатор саволлар билан мурожаат қилмоқда. Ушбу мавзуни кенгроқ ёритиш мақсадида Ягона умумреспублика процессинг маркази ходимлари томонидан яратилган ‘SMS-хабарнома хизматини масофадан ўчириш —Stop1’ хизматининг имкониятларига тўхталиб ўтмоқчимиз», — дейилади хабарда.
Маълумки, агар бирор-бир мобил алоқа оператори мижози 3 ой давомида телефон рақамидан фойдаланмаса, у ҳолда мобил алоқа оператори автоматик равишда уни блоклаб, янги рақам эгаси ихтиёрига топшириши мумкин. Шу ўринда савол келиб чиқади: агар телефон рақамининг илк эгаси ўз пластик картасини унинг блокланишидан аввал мобил телефон рақами орқали мобил дастурларга улаган бўлса, у ҳолда телефон рақамининг янги эгаси ҳам мобил дастурлар орқали пластик картадан фойдалана олиши мумкинми?
«Марказимиз мутахассилари томонидан шу каби ҳолатларни бартараф қилиш учун ‘SMS-хабарнома хизматини масофадан ўчириш—Stop1’ хизмати жорий қилинган. 3 ой давомида ишлатилмаган мобил телефон рақами янгидан сотувга чиқишидан аввал мобил алоқа компанияси Ягона умумреспублика процессинг марказига мобил рақам ҳақида маълумот юборади ва унга бириктирилган UzCard карталарининг смс-хабарнома хизмати фаоллигини тўхтатади. Ўз навбатида барча тўлов тизимларига (мобил дастурлар ва ҳоказо) фойдаланувчилар паролларини тўлиқ қайта тиклаш функциясидан фойдаланганларида, кабинетга бириктирилган картага оид маълумотларни тозалаш ва тўлов тизимида хавфсиз фойдаланиш даражасини ошириш тавсия қилинган», — дейилади хабарда.
Таъкидланишича, «SMS-хабарнома хизматини масофадан ўчириш—Stop1» хизматининг жорий қилиниши мобил алоқа мижозларининг карта хавфсизлигини таъминлашда ҳамда рақам янги мижоз ихтиёрида эмаслигига ишонч ҳосил қилишда ўз қулайлиги билан ажралиб туради.
Изоҳ (0)