Тошкентда халқ орасида Бродвей сифатида машҳур бўлган Сайилгоҳ пиёдалар кўчасида синов тартибида Ички ишлар бош бошқармаси патруль-пост хизмати пункти ишлай бошлади, деб ёзади «Газета.uz».
Police деган ёзув туширилган ва 102 телефон рақамига эга кондиционерли будкада кеча-ю кундуз милиция ходимлари навбатчилик қилади. Уларнинг ихтиёрида ҳудудда патруллик қилиш учун зарур бўлган иккита мотороллер ва битта автомобиль бор.
Бу ерда ишлайдиган ходимларнинг вазифаси — ҳудуд хавфсизлигини таъминлаш ҳамда шаҳарликлар ва туристларга зарур ёрдамни кўрсатиш.
Ходимларнинг бир қисми чет тилларида гаплаша олади. Будкада Тошкент хариталари ҳамда меҳмонхоналар, савдо-кўнгилочар марказлари ва сайёҳларга қизиқарли бўлган бошқа жойлар ҳақидаги буклетлар бор.
Мониторда пиёдалар кўчасини ва унга ёндош ҳудудларни қамраб олувчи ўндан ортиқ видеокузатув камералари тасвирлари акс этади.
Эслатиб ўтамиз, Тошкентда Зарафшон кўчасининг Сайилгоҳ кўчасидан Матбуотчилар кўчасигача бўлган участкаси пиёдалар ҳудудига айлантирилди.
Изоҳ (0)