Туркияда ўзбек алломаларининг дипломатияга оид мероси ўрганилмоқда

Ўзбекистоннинг Туркиядаги элчихонасида ўз даврининг забардаст олимларидан бири Абу Бакр Сарахсийнинг халқаро ҳуқуқ, дипломатия ҳуқуқи соҳасидаги қарашларига оид илмий семинар ташкил этилди. Бу ҳақда ЎзА хабар берди.

Жорий йил 11 январда Ўзбекистон Президенти Шавкат Мирзиёев бошчилигида Ташқи ишлар вазирлиги ва мамлакатнинг хорижий давлатлардаги ваколатхоналари фаолиятига бағишланган йиғилиш ўтказилган эди. Мажлисда дипломатия соҳасидаги қатор долзарб масалалар сирасида ушбу йўналишда кадрлар тайёрлаш, бу борада буюк аждодларнинг бой тарихий меросини ўрганиш лозимлиги қайд этилганди.

Ўзбекистоннинг хориждаги ваколатхоналари ушбу вазифалардан келиб чиқиб халқимизнинг дипломатия соҳасидаги илмий-тарихий меросини ўрганишга эътибор қаратмоқда.

Тадбирда Ўзбекистоннинг Туркиядаги Фавқулодда ва мухтор элчиси Алишер Аъзамхўжаев ўзбек дипломатияси тарихини ўрганиш ва юзага чиқариш чет элда хизмат қилаётган дипломатларни руҳлантиришини таъкидлади.

Семинарда Анқара университети Ижтимоий фанлар институти докторанти Абдулмалик Тўйчибоев Сарахсийнинг ҳаёти, илмий мероси, ислом ҳуқуқшунослиги асосида деярли минг йил олдин илгари сурган дипломатияга оид фикрлари ҳақида маъруза қилди.

1010 йилда Сарахс шаҳрида туғилган Абу Бакр Сарахсий ёшлигида илм талаби билан Бухорога келган. Бу ерда ўз даврининг алломалари бўлган Абдулазиз Ҳалвоний ва қозикалон Рукниддин Сўғдийдан таълим олган. Устозларидан сўнг мамлакатнинг энг илғор олими даражасига етган.

Салжуқийлар салтанатида вояга етган аллома ислом оламида машҳур «Усул», «Мабсут» ва «Шарҳ ас-сияр ал-кабир» асарларини ёзган. Булар ичида «Мабсут» ва айниқса, «Шарҳ ас-сияр ал-кабир» асарларида ўз даврининг халқаро ҳуқуқ қоидалари, жумладан, элчилик муносабатларига оид тартиблар чуқур таҳлил этилган.

Тадбирда Абу Бакр Сарахсийнинг ёзган асарлари, айниқса 30 жилдли «Мабсут» асари ҳали-ҳануз Туркия ва бошқа қатор хорижий давлатларда қадимий илмий манба сифатида хизмат қилиб келаётгани таъкидланди.

Интерфаол мулоқот шаклида ўтказилган семинар якунида Абу Бакр Сарахсий каби аждодлар мероси билан кенг оммани таништириш муҳимлиги қайд этилди.