Ўзбекистон мўъжизаси: 500 метр чуқурликда қайнаётган булоқ

«Қайнар булоқ» зиёратгоҳи Ўзбекистоннинг кўркам масканлардан бири. Бу ерлар қадимдан сувга сероб бўлиб, замин бағрини ёриб чиққан олтита булоқ ўзидан нафис жило таратиб, кишиларни ҳайратга солиб келган, деб ёзмоқда ЎзА.

Ер остидаги маълум бир чуқурликдан қайнаб, тошиб чиқадиган булоқнинг софлик даражаси, шифобахш хусусиятлари таърифини эшитиб, ҳаттоки, ўзга юртлардан келган беморлар ҳам ўз дардларига шифо топмоқдалар, дейилади агентлик хабарида.

Мутахассисларнинг таъкидлашларича, Қайнарбулоқнинг оромбахш суви нафақат инсон кайфиятини кўтаради, балки унинг саломатлиги учун ҳам яхши таъсир кўрсатиб, ичак йўлларининг шамоллаши, ошқозон яраси, жигар, буйрак, юрак қон томирлари ҳамда тошма касалликларини даволашда муҳим аҳамият касб этади.

«Баъзида Қайнар булоқнинг суви 500 метр чуқурликдан қайнаб отилгандаги шиддатли овози узоқ-узоқларга эшитилиб, кишиларни ҳайратга соларди», – дейди маҳаллий аҳоли вакиллари. – «Бундан ҳеч ким чўчимайди, балки ана шундай илоҳий мўъжиза бизнинг атрофимизда юз бераётганидан фахрланамиз. Ахир, кичик бир булоқ шаклида кўз очиб, жилосидан кўз қамашадиган бу булоқ сувининг тиниқ ва шаффофлиги ҳар инсонга завқ беради. Кайфиятини кўтаради».

Булоқ ҳақидаги афсонагакўра, бир вақтлар булоқ атрофидан шаҳар марказига элтувчи йўл ўтган. Шошган йўловчилар тезроқ манзилга етиш учун булоқ яқинидаги тор йўлакчадан сакраб ўтган. Бир куни шаҳарга йўл олган шошқолоқ йўловчилардан бири булоқ яқинига келиб, энди ўтмоқчи бўлганда ёнида отлиқ бир мўйсафид пайдо бўлганини кўриб қолади.

Мўйсафид булоқ атрофини уч бор айланиб яна кўздан ғойиб бўлган. Шундан буён бу ерлик одамлар шаҳар марказига бориш учун булоққа яқин йўлдан ўтишга чўчиб қолишган. Узоқ бўлсада бошқа йўлдан хотиржам манзилга етиб олишга ҳаракат қилишади. Ўша даврдан буён кўпчилик от устида пайдо бўлган мўйсафидни «Қайнар бува»нинг руҳи деб, бу жойни муқаддас зиёратгоҳ сифатида қадрлаб келмоқда.

Бугунги кунда бу жойлар ободонлаштирилиб, Қайнар бува мозори муқаддас зиёратгоҳга айлантирилди. Ана шу жараёнда унинг ёнидаги олтита булоқ атрофи янада кенгайтирилди.