27 май куни эрталабки соат 06:30–07:00 ўртасида Хоразм вилоятида тузли қум бўрони кузатилди. Бу ҳақда «Дарё»нинг мобил мухбири маълум қилди. Шунингдек, ижтимоий тармоқларда фото ва видеоматериаллар тарқалмоқда.
Туз бўрони Урганч шаҳрида, шунингдек, Шовот ва Қўшкўпир туманларида кузатилган. У ҳозиргача бироз сокин суръатларда давом этмоқда. Олдинлари ҳам бундай табиий ҳодисага дуч келган маҳаллий аҳоли вакилларининг айтишича, кучли шамол ўзи билан Орол денгизининг қуриб қолган ҳудудларидан кўтарилган тузни олиб келган. Ушбу минерал таркибидаги натрий экинларга зиён келтириш билан бирга кўчада нафас олишни ҳам қийинлаштиради.
«У япроққа ўрнашиб, фотосинтез жараёнини бузади, ҳаво исиганидан сўнг эса япроққа ўрнашган минераллар қизиб, баргни куйдиради. Натижада ўсимлик барглари қорайиб, қовжираб қолади», — тушунтиради деҳқончилик билан шуғулланиб келаётган қўшкўпирлик А.Р.
«Япроқ қуриганидан кейин ўсимлик ўлади ёки ҳосилдорлик тушиб кетади. Картошка, помидор, қовоқ, бодринг каби сабзавотлар, анжир, айрим олма навлари, беҳи каби тукли япроқли ўсимликлар айниқса катта зарар кўради. Шунингдек, бўрон нафас йўллари ва ошқозон-ичак тизимига зиён келтириши мумкин», — сўзида давом этади у.
Хоразмлик бошқа суҳбатдошларимизнинг таъкидлашича, тезкор чоралар кўрилмаган тақдирда бўрон вилоятдаги деҳқончиликка катта зиён келтириши мумкин.
Изоҳ (0)