Жасур Абдураимов Андижон вилояти Балиқчи тумани ҳокими этиб тайинланди. Бу ҳақда «Kun.uz» хабар бермоқда.
Абдураимов бунгача (2017 йилдан бери) вилоят ҳокимининг қишлоқ ва сув хўжалиги масалалари бўйича ўринбосари — қишлоқ ва сув хўжалиги бошқармаси бошлиғи сифатида ишлаб келаётган эди.
Туманнинг аввалги ҳокими Ўткирбек Бектемиров соғлиғи туфайли туман ҳокими лавозимидан бўшаш ҳақида ариза ёзган. Унинг аризаси халқ депутатлари Балиқчи тумани кенгаши томонидан қаноатлантирилган.
Хабар беришларича, Жасур Абдураимов 1979 йили Балиқчи туманида туғилган, 2000 йили Андижон қишлоқ хўжалиги институтини агроном мутахассислиги бўйича тамомлаган. 2001 йилдан Қишлоқ ва сув хўжалиги вазирлиги тизимида ишлаб келади.
Қайд этишларича, Жасурбек Абдураимовнинг отаси Одилжон Абдураимов ҳам ўз вақтида Андижон вилоятининг Балиқчи туманига ҳокимлик қилган, бундан ташқари, Андижон вилояти ҳокимининг қишлоқ хўжалиги масалалари бўйича ўринбосари бўлган.
Изоҳ (0)