Бухоронинг Қоракўл туманида замонавий чорвачилик мажмуаси очилди. Бу ҳақда «Дарё»га Давергеодезкадастр қўмитаси маълум қилди.
БМТ Тараққиёт Дастури, Глобал экологик жамғарма ва Давергеодезкадастр қўмитаси билан ҳамкорликда «Ўзбекистоннинг тоғли, ярим чўл ва чўл ландшафтларида суғорилмайдиган қурғоқчил ерларни рақобатли эксплуатация қилиниши натижасида табиий ресурслардан фойдаланиш босимини камайтириш» лойиҳаси маблағлари ҳисобидан Бухоро вилояти Қоракўл тумани «Қоракўл» наслчилик МЧЖ «Учқир» массивида битта чўпон оиласи учун замонавий 3 хонали уй, 750 бош қоракўл қўйларини сақлаш учун қўтон, сув ва электр энергия таъминоти, ҳожатхона, жун қирқиш жойи, дағал хашакларни сақлаш учун очиқ омборхона, сув минораси ва қўйларни даволаш учун зооветеринария пункти каби инфратузилма шохобчаларини ўз ичига олган ихчам чорвачилик мажмуаси бунёд этилди.
17 май куни мажмуанинг расмий очилишида БМТТДнинг Ўзбекистондаги доимий вакили Хелена Фрейзер, Давергеодезкадастр қўмитаси раиси А.Ҳ. Абдуллаев, Қоракўл тумани хокими Х.М. Ғойиров, Бухоро вилояти ва Қоракўл тумани хокимликларининг масъул ходимлари иштирок этди.
Лойиҳа томонидан мажмуа атрофида жойлашган 7,5 минг гектар яйловдан самарали ва барқарор фойдаланиш мақсадида «Яйловдан режали фойдаланиш тизими» ишлаб чиқилади ва ҳамкорликда жорий қилинишига амалий ёрдам кўрсатилади.
Хелена Фрейзер хоним вилоятнинг масъул раҳбарлари билан биргаликда Қоракўл туманининг фермер ва деҳқон хўжаликларида лойиҳа доирасида амалга оширилган бошқа тадбирлари билан яқиндан танишди.
Изоҳ (0)