АҚШнинг собиқ президенти Барак Обама ва унинг оиласи Netflix компанияси билан ҳамкорликда фильм ҳамда сериалларни суратга олади. Улар бу борада ўзаро шартнома имзолади, деб хабар беради KNews.
Режалаштирилган лойиҳаларни амалга ошириш учун собиқ президент ва унинг рафиқаси Higher Ground Productions хусусий продюсерлик компаниясига асос солди. Бироқ ҳозирда Netflix ва Обамалар оиласи қандай фильм ва сериалларни тасвирга олиши ҳақида маълумот йўқ.
«Биз одамларда меҳр-шафқат ва ҳамжиҳатликни уйғотишга хизмат қиладиган иқтидорларни, ижодий овозларни етиштиришга, шунингдек, уларга ўз тарихини дунё билан бўлишиш борасида ёрдам бериш ниятидамиз», — дейди Обама.
Тахминларга кўра, контент 2019 йилдан бошлаб пайдо бўлади.
Netflix бутун дунё бўйлаб 125 миллион обуначисига эга. Компания ўз дастурларини кузатувчи томошабинлар сонини ошкор этмасликка ҳаракат қилади, бироқ ўсиб бораётган бозорда стриминг сервислар етакчи эканлиги барчага аён. Nielsen компанияси маълумотларига кўра, ушбу сервислар барча телекўрсатувларнинг 10 фоизини ташкил этади, Netflix эса бозорнинг 49 фоизига эгалик қилган ҳолда, улар орасида етакчи ҳисобланади.
Изоҳ (0)