Мутасаддилар — пешонага «2» қўйиш ҳолатлари ҳақида: «Ўқитувчилар йиллар давомида жамоат ишларига жалб қилингани ўз таъсирини кўрсатмоқда» (видео)

Бекобод шаҳар прокуратураси 14 май куни Тошкент вилоят халқ таълими бошқармаси билан ҳамкорликда Бекобод шаҳридаги 5-мактабда ўқувчиларнинг пешонасига «2» баҳо қўйилиши ҳолати юзасидан текшириш бошлади.

15 май куни эса вилоят халқ таълими бошқармасининг кенгайтирилган ҳайъат йиғилиши Бекобод шаҳридаги 5-мактабда бўлиб ўтган, дея хабар бермоқда «Ёшлар» телеканалининг «Давр» информацион дастури.

Бу ҳолат бугун бўлиб қолмаган. Мен оммавий ахборот воситаларига ўз миннатдорчилигимни билдираман. Сабаби, бу ҳақда мақолалар берилмаганида эди, болаларимиз бундан-да ёмонроқ қийналган бўларди. Узоқ йиллар давомида педагогларимизни ҳар хил жамоатчилик ишларига жалб қилиб келдик. Бу эса қайсидир маънода уларнинг фаолиятида бўшлиқлар пайдо юзага келишига сабаб бўлди.

Шукур Бурҳонов, Тошкент вилоят халқ таълими бошқармаси бошлиғи

Хабар беришларича, айнан шу ҳайъат йиғилишида мактаб директори, болаларнинг пешонасига «2» баҳо қўйган ўқитувчилар, шунингдек, мактаб директорининг ўринбосарлари ҳам ишдан ҳайдалган.Маълумот учун, Ўзбекистон Президенти ташаббуси билан 17 апрель куни бош вазир раислигида ўтказилган видеоселектор йиғилишида, шунингдек, ҳукуматнинг 10 майдаги қарори билан мутасаддиларга фуқароларни, жумладан, ўқитувчиларни ҳудудларни ободонлаштириш ҳамда кўкаламзорлаштириш ишлари, мавсумий қишлоқ хўжалиги ишлари, металл чиқиндилари ва макулатура йиғиш, шунингдек, бошқа турдаги мавсумий ишларга жалб қилиш ҳолатларига зудлик билан чек қўйиш ҳақида кўрсатма берилган эди.