Олимлар Қуёшдан 13 миллиард ёруғлик йили масофасида жойлашган галактикани аниқлади

Астрономлар коинотда Катта портлашдан 250 миллион йил ўтиб вужудга келган галактикани аниқлашди. Бу ҳақда «ТАСС» хабар бермоқда.

MACS1149-JD1 юлдузлар қўшилмаси Қуёш системасидан 13,28 миллиард ёруғлик йили масофасида жойлашган. Ҳозиргача ўрганилган космик жисмлар ичида янги галактика Қуёш системасидан энг узоқда жойлашган. Астрономик кузатишлар иштирокчиларидан бири, Лондондаги университет коллежи ходими Николас Лапортнинг айтишича, галактика кислород топилган энг олисдаги космик объектдир.

Галактикани кузатиш ишлари 2012 йили бошланган. Ҳозирда «Хаббл» ва «Спитцер» орбитал телескоплари орқали олинган маълумотларни ўрганиб чиқиб, астрономлар галактикагача бўлган масофани янада аниқроқ ўлчашга муваффақ бўлди. «Бу вақт ва замон бўйлаб ўзига хос саёҳат, Катта портлашга қайтишдай гап», — дейди астроном. Олимларнинг мақсади — Борлиқ вужудга келишининг дастлабки босқичини ўрганиш. Шунда олимлар энг асосий саволга жавоб топишга муваффақ бўлади: дастлабки юлдуз ва галактикалар қандай бўлган? Николас Лапортнинг фикрича, MACS1149-JD1 галактикасини кузатиш ишлари бу йўналишда қўйилган муҳим қадамлардан бири бўлади. Астроном Ричард Боуэнснинг фикрича, олисдаги галактикаларни янги Жеймс Уэбб орбитал телескопи орқали кузатиш керак. Телескоп кўзгусининг диаметри 6,5 метрни ташкил қилади, у 2019 йилнинг март июнь ойларида орбитага учирилади.