Уч кун узлуксиз ёққан ёмғир оқибатида Қашқадарё вилоятининг Китоб, Чироқчи, Яккабоғ ва Деҳқонобод туманларида бир неча бор сел тошқинлари кузатилди. Бу ҳақда вилоят фавқулодда вазиятлар бошқармасига таяниб, «Халқ сўзи» хабар бермоқда.
Жумладан, 15 май куни соат 19:40 ларда Китоб туманида ёққан кучли ёмғир натижасида тумандаги «Макридсой», «Чиллисувсой», «Қарлисой» сойлари ҳудудидаги қир-адирлардан йиғилган сув сел оқимини вужудга келтириб, «Санглаксой» сойига қуйилган. Натижада сойга сиғмаган сув Китоб-Макрид автомобиль йўлига чиқиб, Макрид қишлоғи чорраҳасигача тошиб борган.
«Жиллисув» қишлоғида 5 та хонадон аҳолисини сел сувларидан ҳимоялаш учун вақтинча хавфсиз хонадонларга кўчирилган. Шунингдек, ушбу қишлоқдаги 15 та хонадоннинг молхона, ҳовли деворлари, ёрдамчи бинолари, аҳоли томорқалари ва экин майдонларига талафот етган.
Ушбу ёғингарчиликлар натижасида Деҳқонобод туманидан ўтувчи M-39 автомобиль йўлининг 1275 ва 1298-километрларига кўп миқдорда сел сувлари йиғилиши автомобиль йўлининг 5 километр қисмини ювиб кетишига сабаб бўлган. Натижада транспорт воситалари ҳаракати чекланиб, бир томонлама йўлга қўйилган. Тумандаги «Катта ва кичик Ўра» сойидан кўп миқдордаги ёмғир сувлари келиши оқибатида ушбу йўналишдаги жами 10 та кўприкдан 7 тасига турли даражада зиён етган. Сел сувлари аҳоли яшаш ҳудудидаги 11 та хонадонга турли даражадаги талафот етган. Фуқароларнинг 10 дан ортиқ йирик ва майда шохли чорва молини оқизиб кетган.
Шунингдек, Яккабоғ туманидаги «Ишкент» ва «Гулдара» қишлоқларидаги 4 та темирбетон сув ўтказувчи кичик кўприклар сел сув оқими натижасида қисман ювилиб кетган.
15 май куни содир бўлган кучли ёғингарчилик натижасида Чироқчи туманининг «Наврўз», «Ғалаба», «Пахтакор», «Ўзбекистон», «Уйшин» ва «Бешчашма» МФЙ ҳудудларидаги 50га яқин аҳоли хонадонларининг ҳовли ва томорқаларига сел сувлари кириб келди. Ушбу сел сувлари Самарқанд вилояти ҳудудидан ўтувчи Эскианҳор канали билан кесишадиган Жомсой сойи орқали йиғилган ёмғир суви ҳамда Китоб тумани ҳудудидаги ёмғир сувларининг Эскианҳор каналининг эски ўзанига келиб тушиши оқибатида пайдо бўлган.
Вилоят фавқулотда вазиятлар бошқармаси билан бирга ички ишлар ходимлари, сув хўжаликлари ва тегишли ташкилотлар ҳамда қишлоқлар аҳолиси томонидан махсус техника воситалари жалб этилган ҳолда барча кучлар табиий офат оқибатларини бартараф этишга қаратилмоқда. Шунингдек, тегишли мутахассисларни жалб этган ҳолда Китоб, Чироқчи, Деҳқонобод ва Яккабоғ туманларида сел тошқинлари келтирган зарар миқдори аниқланмоқда.
Эслатиб ўтамиз, олдинроқ вилоятда сел 5 кишининг умрига зомин бўлгани билдирилганди.
Изоҳ (0)