Тошкент шаҳридаги Wyndham меҳмонхонасида ўтказилган семинар Ўзбекистоннинг Жаҳон савдо ташкилотига қўшилиш жараёнини қайта йўлга қўйиш масаласига бағишланди. Бу ҳақда ЎзА хабар бермоқда.
Ташқи савдо вазирлиги, Жаҳон банки ва АҚШ Халқаро тараққиёт агентлиги (USAID)нинг мамлакатдаги ваколатхонаси ҳамкорлигида ташкил этилган тадбирда маҳаллий давлат органлари, Жаҳон савдо ташкилоти, Тожикистон, Қозоғистон давлатлари вакиллари ва ОАВ ходимлари иштирок этди.
Яқинда Ўзбекистон ҳукумати олий даражада Жаҳон савдо ташкилотига кириш жараёнини давом эттиришга тайёрлиги ҳақида хабар берди. Шу муносабат билан Ташқи савдо вазирлиги ҳузурида ЖСТга кириш бўйича масъул ишчи гуруҳ ва 7 ихтисослашган кичик гуруҳ ташкил этилди. Айни чоғда ЖСТга кириш бўйича «йўл харитаси» ишлаб чиқилмоқда.
Ўзбекистон Жаҳон савдо ташкилотига кириш учун 1994- йилда ариза топширган. Бугунги кунгача ЖСТ вакилларидан иборат ишчи гуруҳнинг 3 та сессияси бўлиб ўтган бўлса-да, шу вақтга қадар бу масалада аниқ келишув амалга оширилмаган.
Семинарда ЖСТга кириш бўйича халқаро, кўп томонлама ва икки томонлама музокаралар, ЖСТ келишувлари бўйича низомлар, минимал мажбуриятлар ва имтиёзлар ҳақида маълумотлар берилди.
Изоҳ (0)