Наманган вилояти Янгиқўргон туманида яшовчи 9 ёшли Нилуфар Шарипова ҳозирда оғир хасталик билан курашмоқда.
«Нилуфар оиламизнинг тўнғич фарзанди, бизни биринчи қувончимиз сабабчиси. Қизим икки ўғил укасидан фарқли равишда ҳаётга ва билим олишга қизиқиши жуда баланд эди. Уни айнан шу қизиқиши туфайли мактабга 6 ёшида қабул қилишди.
Қизимнинг ютуқларидан хурсанд эдик. Аммо қувончимиз узоққа чўзилмади.
Нилуфар мактабдан келиб, ҳолсизланиб тез-тез ухлаб қоладиган бўлди. Орадан бироз вақт ўтгач, у оёқларим оғрияпти, деб мактабга боролмай қолди. Мен Нилуфарни туман шифохонасига олиб бордим, шифокорлар унга ўткир ревматизм деб ташхис қўйди. Нилуфарни шу ташхис билан икки йил даволатдик. Лекин натижа аввалгидан ҳам ёмонроқ эди. Қизим соғлиғи ёмонлашгани туфайли мактабга умуман боролмай қолди. Оғриқ кучлилигидан кечалари ухлолмай, бу дарддан азоб чекар эди.
Туманда ташхисни тўғри тополмай, вилоятга жўнатишди. Афсуслар бўлсинки, у ердаги ташхис ҳам нотўғри қўйилди. Нилуфарни Жарроҳлик бўлимига жойлаштиришди. Шифокорлар оёғи шишиб, йиринглаб кетган, кесиб олиб ташлаймиз, дейишди.
Лекин Аллоҳим асраб, унинг оёқларидаги шиши антибиотик дориларни олгач қайтди. Оғриқ кучли бўлганлиги сабабли шишган экан. Шу тариқа қизимиз икки йил нотўғри ташхис туфайли азоб чекиб юрди.
2017 йил 18 майида Тошкент гематология ва қон қуйиш илмий текшириш инстутига олиб келдик. Пойтахт тиббий муассасасида Нилуфарга ўткир лимфобластик лейкоз деган ташхис қўйишди. Биз қизимизни бундай касал бўлганидан қаттиқ изтироб чекдик. Нилуфар эса мактабдошларидан узоқда дори ва уколларга тун-у кун боғланган. Худди уларсиз яшай олмасдек эди.
Унда ирода ўта кучли. Албатта, бу касалликни енгиб, ўртоқлари сафига қўшилади, деган умиддаман. Қизим шифо топиши, даволаниши учун ўтган бир йил давомида бор-будимизни сотдик. Қариндошлар ҳам ёрдам беришди. Дўст танишларимиздан ҳам қарз олиб бўлдик.
Қизимиз яна бир йил мобайнида даволананиши зарур. Отаси маблағ топиш мақсадида Россияга кетган. Лекин ишлари ҳозир яхши эмас. Нилуфарнинг муолажалари тўхтаб қолмаслиги учун курашяпмиз. Лекин моддий томондан анча қийналиб қолдик», — дейди Нилуфарнинг онаси.
Ҳозирда оила Тошкент шаҳрида ижара уйда яшайди. Нодира опа қизининг даволаниш харажатларидан ташқари ҳар ой ижара учун 150 АҚШ доллари тўлашга мажбур. Ҳар ой ижарага ва Нилуфарнинг даволаниши учун маблағ етишмай қоляпти.
Шу боис Нилуфарнинг оиласи айни вақтда моддий кўмакка муҳтож.
Бир олам орзулар билан ҳаёт учун курашаётган Нилуфархондан ёрдамингизни аяманг! Унга имкон қадар ёрдам берайлик!
Хайрия қилмоқчи бўлганлар учун керакли маълумотлар:
Пластик карта орқали: (Click, Payme) Абдуқодирова Нодирахон.
Агробанк: 8600-0424-8218-8520
Халқ банки: 8600-0609-9765-6955.
Онаси Нодирахон Абдуқодированинг телефон рақамлари:
+99890 326 07 18
+99894 171 86 11
Изоҳ (0)