Франция ташқи ишлар вазири Жан-Ив Ле Дриан Чеченистон раҳбари Рамзан Қодировнинг сўзларини кескин шаклда танқид қилди. Қодиров яқинда Франция пойтахтида юз берган теракт учун жавобгарликни расмий Парижга юклаган эди. Бу ҳақда «MK.ru» хабар берди.
Вазирнинг сўзларига кўра, Франция ўз ҳуқуқий давлатининг биринчи қадамларини ҳурмат қилмайдиган диктаторнинг ўгитларини қабул қилмайди. Шунингдек, Ле Дриан Қодировга ИШИД томонида жанг қилаётган минглаб чеченлар ҳақида эслатган.
12 май куни кечқурун Парижда чеченистонлик Ҳасан Азимов кўчадаги одамларга ҳужум қилган, оқибатда бир киши ҳалок бўлган, яна бир неча киши жароҳат олган. Террорчининг ўзи эса полиция томонидан йўқ қилинган.
Кейинроқ маълум бўлишича, экстремист 2010 йилда Франция фуқаролигини олган. Чеченистон раҳбари Рамзан Қодиров террорчи Чеченистонда туғилганини тасдиқлаган, бироқ унинг қарашлари шаклланишида жавобгарликни Францияга юклаган.
ОАВ томонидан хабар берилишича, Азимов бир неча йил аввал Франция махсус хизматларининг назоратига тушган. У потенциал хавфли одам сифатида қаралган, бироқ унга нисбатан ҳеч қандай чора кўрилмаган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)