Бугунги кунда пойтахт йўлларида ҳаракат хавфсизлигини таъминлаш, тирбандликларнинг олдини олиш ва бартараф қилиш ҳамда йўлларнинг ўтказувчанлигини ошириш мақсадида Тошкент шаҳар ИИББ томонидан кенг кўламли амалий чора-тадбирлар олиб борилмоқда, деб хабар беради Тошкент шаҳар ИИББ матбуот хизмати.
Бироқ, шунга қарамай, тўхташ ва тўхтаб туриш тақиқланган йўл белгилари таъсир доирасида, шунингдек, автобус бекатлари, пиёдалар йўлкалари (тротуарлар), светафорлар, бурилиш ва қайрилиб олиш каби белгиланмаган жойларда автотранспортларнинг тўхтаб туриши ёки уларни қаровсиз қолдириб кетиш ҳолатлари учрамоқда.
«Бундай ҳолатларга қарши таъсир доирасини кучайтириш мақсадида Тошкент шаҳар ИИББ ЙҲХБ ходимлари томонидан эндиликда белгиланмаган жойларда қолдирилган автомобиллар фото ва видео тасвирга олиниб, ўрнатилган тартибда қоидабузарликларни расмийлаштириш жараёни бошланганлигини маълум қиламиз», — дейилади хабарда.
Шунингдек, Тошкент шаҳар ИИББ ЙҲХБ ходимлари ҳайдовчилардан эътиборлироқ бўлишни ва бошқа ҳайдовчиларни ҳурмат қилишни сўрамоқда.
Изоҳ (0)