Тошкент шаҳрининг Сергели тумани билан Тошкент вилоятининг Зангиота тумани кесишадиган катта йўл ёқасида 9 ёшли Бахтиёр Омонов онаси билан майда-чуйда (писта, қурут, яхна ичимликлар) сотиб кун кўрган. Улар бошпанасиз қолган. «Оила даврасида» газетасида ёзилишича, аёлнинг турмуш ўртоғи вафот этган, уни ўз яқинлари кўчага ҳайдаб чиқарган. Аёл тўққиз йилдан бери фарзанди билан сарсон-саргардон, бошпанасиз, кўча-кўйда, тентираб юрган аёлга ҳатто, ўзи туғилиб вояга етган маҳалласи мутасаддилари ҳам ёрдам беришни истамаган.
Кузнинг совуқ ва ёмғирли кунларидан бирида уни ёши олтмишдан ошган бир мўйсафид Тошкент вилояти Паркент туманига олиб кетган. Уни ўз қизидек кўриб, олти ёшли Бахтиёрнинг суннат тўйини ўтказган. Бола етти ёшга тўлгач, шу тумандаги 35-умумтаълим мактабига ўқишга берган. Шу отахоннинг ёрдами билан Бахтиёр ўқишга қатнай бошлаган.
Биринчи синфни тамомлашига икки ойлар вақт қолганда мактаб раҳбари алмашган. Янги директор эса Бахтиёрнинг ҳеч бўлмаса ўқув йилини тугатишига ҳам рухсат бермай, ҳужжати йўқлигини рўкач қилиб мактабдан чиқариб юборган.
Ушбу муаммо Халқ таълими вазирлиги томонидан ўрганиб чиқилган ва ижобий ҳал этилган. Бу ҳақда Uz24 хабар беради.
«Тўққиз ёшли Омонов Бахтиёр Зангиота туманидаги 33-сонли мактабнинг 2-синфига қабул қилинди. Ўқувчини таълим муассасасига қабул қилишда зарур бўлган ҳужжатларни тайёрлаш учун туман ҳокимлиги ҳузуридаги Вояга етмаганлар ишлари бўйича комиссиясига ариза билан мурожаат қилинди.
Ҳозир Бахтиёр тенгдошлари билан бирга таълим олмоқда, янги муҳитга мослашиш ҳамда қолдирилган мавзуларни ўзлаштиришда унга мактаб психологи ва синф раҳбари яқиндан ёрдам бермоқда. Шу ўринда, вазирлик томонидан барча ҳудудий халқ таълими бошқарув идоралари раҳбарларига 7 ёшга тўлган ҳар бир бола Конституциямиз билан кафолатланган бепул таълим олишга ҳақли экани ва бу ҳуқуқни таъминлашда барча даражадаги раҳбарлар шахсан масъул экани яна бир бор эслатилди», — дейилади вазирлик маълумотида.
8 май куни Facebook’даги ижтимоий гуруҳ вакиллари ушбу ҳолатни ўрганиш ҳамда Меҳринисо Омонова ва унинг боласига ёрдам бериш учун, улар билан кўришиб ижтимоий тармоқлар орқали фойдаланувчиларга мурожаат этган.
Изоҳ (0)