ЎзА миллий ахборот агентлиги «Тошкент марказий универсал магазини» (собиқ «ЦУМ» дўкони) ёнидаги хиёбон ҳақида танқидий мақола чоп этди. Уни тўлиғича келтириб ўтамиз.
Пойтахтимиз қоқ марказида эътиборсиз қолаётган шундай номсиз хиёбон бор. Бу жойни кўпчилик яхши билишади. Бироқ негадир ушбу маскан мутасаддилар назаридан четда қолаётгандек назаримизда.
Шаҳарнинг қоқ марказида жойлашган, каттагина ҳудудни эгаллаган хиёбонни айлансангиз, гап нимада эканини англайсиз. Биз, «Тошкент марказий универсал магазини» (собиқ «ЦУМ» дўкони) ёнидаги хиёбонни назарда тутяпмиз. Қарийб беш-олти гектар майдонни эгаллаган ушбу маскан қуюқ дарахтлар билан қопланган баҳаво ва сокин гўша. Лекин афсуски, Шўролар даврида барпо этилган ушбу сайлгоҳ, тан олиш керак, истиқлол йилларида эътибордан четда қолди. Сўлим хиёбонни кезсангиз, бу ердаги манзаралар дилингизни хуфтон қилиши турган гап.
Бир пайтлар йўлакларга дидсизлик билан ётқизилган шапалоқдек бетон плиталар аллақачон дизайн нуқтаи назаридан эскирган, йўлкаларни ўт босиб кетган. Йўлаклар четига ўрнатилган ёғоч ўриндиқлар эса шунчалик харобки, ҳатто ўтиришга кишининг кўнгли тортмайди.
Хиёбон марказидаги ҳожатхона юзга чиққан чипқонни эслатади. Бу ерда на тозалик, на санитария-гигиена қоидалари хусусида гап-сўз бўлиши мумкин эмас. Шу ҳолига ҳам киришни фалон сўм, деб белгилаб ўтирган қоровулни кўриб, кулгингиз қистайди. Унинг ташқи кўринишига қараб, ичкаридаги ҳолатни тасаввур этиш қийин эмас.
Ёғоч ўриндиқлар атрофи, дарахтлар қуюқроқ жойлар эса ичимликлардан бўшаган идишлар, турли пакет ва қоғозлар билан тўлиб-тошган.
Шу боис бўлса керак, бу ерда ҳордиқ олишга келадиганлар сони бармоқ билан санарли. Кундуз куни хилват жойни хуш кўрадиган тўрт-беш жуфт йигит-қиз ва зериккан битта-яримта бекорчидан бошқа кимсани учратмайсиз. Кечқурун эса хиёбон хийла гавжумлашади. «Севишганлар» ва бекорчилар сафига шу яқин-атрофдаги дўконлардан спиртли ичимлик харид қилиб, ёғоч ўриндиқларда қўр тўккан улфатлар ҳам қўшилади.
Аслида бу маскан бир пайтлар жуда машҳур гўша бўлган. Хиёбон ҳудудида жойлашган «Мовий гумбазлар» («Голубие купола») кафеси шаҳардаги энг номдор тамаддихоналардан бири ҳисобланар эди.
Расмий манбалардан қидириб бу хиёбоннинг қандай номланишини аниқлай олмадик. Шу ҳолатда унга бирор бир ном ёпишмаслиги ҳам аниқ.
Президентимизнинг талаби ва ташаббуси билан мамлакатимизда китобхонликни оммалаштиришга алоҳида эътибор қаратилмоқда. Бу борада бир нечта ҳужжатлар ҳам қабул қилинди. Ушбу хиёбонда эса узоқ йиллардан бери китоб ва журналлар билан савдо қиладиган қатор расталар мавжуд. Кимгадир ноёброқ китоб ёки қизиқарлироқ журнал керак бўлса, шу ердан топилади. Кўпчилик хиёбонни китоб билан боғлаб тилга олади, шундай экан, уни «Китобхонлар хиёбони» деб номлаб, шунга мос равишда қайта таъмирласак, ўз ҳолича савдо қилаётган китоб расталарини замонавий дизайн асосида тартибга келтирсак, китоб ўқиш учун қулай ўриндиқлар қўйилса, маънавий-маърифий тадбирлар, Ғафур Ғулом номидаги истироҳат боғида ўтказиладиган анъанавий китобхонлар фестиваллари шу ерда ўтказилса, айни муддао бўлур эди.
Изоҳ (0)