Tashkent City марказидаги қабрлар, Ким Чен Ин билан қачон ва қаерда учрашишини эълон қилган Трамп, Райҳонга берилмаган АҚШ визаси ва куннинг бошқа муҳим хабарлари

10 майнинг эътиборга молик янгиликлари — «Дарё»нинг кечки дайжестида.

1. Шавкат Мирзиёев 15—17 май кунлари илк расмий ташриф билан АҚШда бўлади. Расмий ташриф якунида икки мамлакат Президентлари «Ўзбекистон ва Америка Қўшма Штатлари: стратегик шериклик янги даврининг бошланиши» деб номланган Қўшма баёнотни имзолаши кутилмоқда.

2. АҚШ президенти Дональд Трамп ва КХДР етакчиси Ким Чен Ин 12 июнь куни Сингапурда учрашади. Бу ҳақда Трамп твиттерида ёзиб қолдирди.

3. Ўзбекистонда кучсиз ер силкиниши қайд этилди. Маълумотларга кўра, зилзила эпицентри Афғонистоннинг Ҳиндикуш тоғларида жойлашган. 9 май куни ҳам Ҳиндикушдаги зилзила кучи Ўзбекистонда сезилган эди.

4. Самарқандда устига дарвоза қулаб тушган ўқувчи вафот этди. Воқеа юзасидан Самарқанд шаҳар прокуратураси томонидан тергов суриштирув ишлари олиб борилмоқда.

5. Reuters: Ўзбекистон «Ўзбекистон ҳаво йўллари»ни хусусийлаштиришга тайёр, аммо олтин ва нефть устидан назоратни сақлаб қолмоқчи. Шунингдек, Инвестициялар бўйича давлат қўмитаси вакили Сардор Саъдуллаев энергетика тармоғини ҳам изоҳлади.

6. Tashkent City’нинг қоқ марказидаги қабрлар тақдири нима бўлди? Tashkent City’нинг қоқ марказида халқ орасида «Эшонзодалар сағанаси» номи билан машҳур бўлган қабрлар бор.

7. Шайхонтоҳурдаги «Мумтоз» тўйхонаси бузилади. Аввалроқ Tashkent City қурилиши муносабати билан «Эзидёр» ресторани бузилиши ҳақида хабар берилган эди.

8. АҚШ элчихонаси хонанда Райҳонга виза беришдан бош тортди. «Биз ўзимизникиларни хурсанд қилмоқчи эдик, афсуски буни ҳуқуқбузарлик деб топишди ва виза беришни рад этишди».