«Дарё» таҳририятига Хоразм вилояти Ҳазорасп тумани Питнак қишлоғи «Охунбобоев» маҳалласида истиқомат қилувчи Тозагул Саъдуллаева қизи Мадинанинг дардига шифо истаб, ёрдам сўраб мурожаат қилди.
Қизалоқнинг оиласи кам таъминланган, унда уч нафар фарзанд вояга етмоқда.
Аллақачон 4 ёшга кирган Мадина ҳозирги кунга келиб 1 ёшли гўдакка ўхшайди, у ривожланишдан тўхтаб қолган.
Қизалоқнинг жажжи юрагини оғир дард қийнаб турибди, у мураккаб операцияга муҳтож. Шунингдек, унга буйракдаги касаллик, камқонлик ва ривожланишдан орқада қолиш ҳам азоб бермоқдаки, бир неча мураккаб дардлар бирлашиб қизни ҳам, унга куюнаётган ота-онасини ҳам саховатли кишилардан ёрдам сўрашга ундамоқда.
«Ўзим водийданман. Биринчи аёлим вафот этганидан сўнг бир неча йил ўтиб Тозагулга уйланган эдим. Уч қиз кўрдик. Минг афсуски, иккинчи қизим ҳам бемор. Ўзим устачилик қиламан. Ҳозирда соғлигимда жиддий муаммолар сабаб ишлай олмайман. Агар саховатли инсонлар кўмак берсалар, бутун умр дуо қилиб ўтардим», — дейди Мадинанинг отаси Мирзоакбар Халилов.
«Охирги пайтлар қизимнинг аҳволи янада оғирлашди, иштаҳаси йўқолди, бурнидан сабабсиз қон кела бошлади. Яқин муддатда операция қилинмаса соғлиги ижобий томонга ўзгармаслиги тобора аёнлашмоқда. 2016 йилда туғилган иккинчи фарзандим Рўзибиби исмли қизимни ҳам юрагида камчилиги бор экан. Биринчи фарзандим Мадинабону учун белгиланган операция буйрагидаги касаллик, камқонлик туфайли ортга сурилаяпти. Буларнинг ҳаммасини даволаш учун моддий таъминотдан жуда кўп харажат талаб қилади.
Турмуш ўртогим яқинда оғир ҳолатда кўричак операциясини бошдан кечирди. Еган овқати сингмайди. Бу ҳолатда мендан кейин сиз ва болалар нима қиласизлар деб қаттиқ сиқилиб ўзини олдириб қўйди. Оилавий таъминотимиз кичик қизим билан катта қизимни нафақаси ҳисобига 5 жон тирикчилик қиламиз. Ўзимни соғлиғим ҳам ижобий даражада эмас. Она учун фарзандининг кўз ўнгида сўлиб боришини кўришдан оғирроқ азоб бўлмас экан»,— дейди қизчанинг онаси Тозагул Саъдуллаева.
Мадинанинг шифо топишига имкон қадар ёрдам берайлик!
Хайрия қилмоқчи бўлганлар учун керакли маълумотлар:
Пластик карта орқали:
(Click, Payme ) Мирзоакбар Халилов
Халқ банки: 8600-0604-4863-4882
Онаси Тозагул Саъдуллаеванинг телефон рақами: +99893 574 04 57
Отаси Мирзоакбар Халиловнинг телефон рақами: +99894 665 04 57
Изоҳ (0)