Тошкент вилоятининг Янгийўл шаҳрида пенсионер З.Волохова фирибгарликка дуч келгани юзасидан ИИБга мурожаат қилди. Бу ҳақда ИИВ жамоатчилик ва ОАВ билан алоқалар бошқармаси хабар берди.
Жабрдийдага кўра, Тошкент шоҳкўчасида жойлашган «Фитнес-клуб» олдида унга ўзларини банк ходимлари деб таништирган икки шахс (улардан бири аёл) яқинлашиб, яқин кунларда Ўзбекистонда АҚШ долларида муомала қилиш чекланиши муносабати билан пенсионерларга имтиёз яратилаётгани ва доллар еврога алмаштириб берилаётганини билдиради.
Фирибгарлар З.Волоховадан 400 доллар ва 50 минг сўм олиб, унга конвертга солинган 200 евро кўринишидаги қалбаки пулларни бериб кетади.
Ушбу жиноятни содир этган шахсларни аниқлаш ва ушлаш чоралари кўрилди.
Ҳолат юзасидан маълумотга эга бўлганлардан 102 телефон рақамига ёки жойлардаги профилактик инспекторларига мурожаат қилиш сўралган.
Изоҳ (0)