Ўзбекистонда «Экстремизмга қарши курашиш тўғрисида»ги қонун лойиҳаси парламентга киритилди

Шу кунларда парламент қуйи палатасининг Мудофаа ва хавфсизлик масалалари қўмитасида «Экстремизмга қарши курашиш тўғрисида»ги қонун лойиҳасини экспертлар ва мутахассислар иштирокида биринчи ўқишда консептуал кўриб чиқиш учун тайёргарлик ишлари олиб борилмоқда. Мазкур ҳужжат Бош прокурорнинг қонунчилик ташаббуси ҳуқуқи асосида Қонунчилик палатасига киритилган, дея хабар беради «Халқ сўзи».

Қўмита раиси ўринбосари Акмал Раҳмоновнинг маълум қилишича, ушбу қонун лойиҳаси экстремистик фаолиятга қарши курашиш соҳасидаги ҳуқуқий муносабатларни тартибга солиш мақсадида ишлаб чиқилган бўлиб, унинг асосий вазифалари экстремистик ҳаракатлардан шахс, жамият ва давлатнинг хавфсизлигини таъминлаш, конституциявий тузумни ва давлатнинг ҳудудий яхлитлигини ҳимоя қилиш, фуқароларнинг тинчлиги, миллатлараро ва конфессиялараро тотувликни сақлаш ҳисобланади.

Қонун лойиҳасида «экстремистик фаолият» («экстремизм»), «экстремист», «экстремизмни молиялаштириш», «экстремистик материал» тушунчаларига аниқ таъриф бериш, экстремизмга қарши курашишнинг асосий принциплари ва йўналишларини белгилаш кўзда тутилмоқда. Экстремизмга қарши курашишни мувофиқлаштирувчи ва амалга оширувчи давлат органлари ва уларнинг ваколатларини белгилаб бериш назарда тутилаяпти.

Қонун лойиҳасини ишлаб чиқишда экстремистик ҳаракатлар учун жиноий-ҳуқуқий жавобгарлик чоралари назарда тутилган АҚШ, Дания, Германия, Нидерландия, Франция каби хорижий мамлакатлар тажрибаси ҳар томонлама таҳлил қилинган. Шунингдек, экстремизмга қарши курашиш тўғрисида махсус қонунлар қабул қилинган Молдова, Россия, Беларусь, Қозоғистон ва бошқа давлатларнинг қонунчилиги қиёсий ўрганилган.

Қўмита раиси ўринбосарининг фикрича, ушбу қонун лойиҳасининг қабул қилиниши, энг аввало, шахс, жамият ва давлатнинг хавфсизлигини таъминлашга, конституциявий тузумни ва давлатнинг ҳудудий яхлитлигини ҳимоя қилиш, фуқароларнинг тинчлиги, миллатлараро ҳамда конфессиялараро тотувликни сақлашга хизмат қилади.

Шу билан бирга, аҳолининг ҳуқуқий онги ва ҳуқуқий маданиятини юксалтириш, экстремистик ҳаракатларнинг ўз вақтида олдини олиш, аниқлаш ва уларга чек қўйиш, шунингдек, жавобгарликнинг муқаррарлиги принципини таъминлаш ҳамда умумеътироф этилган халқаро нормалар ва стандартларни амалга оширишга кўмаклашади.