Фарғона вилояти божхона бошқармаси ходимлари ДХХ ва ДЧҚҚ ходимлари билан ҳамкорликда ўтказилган тезкор тадбир давомида қўшни давлатдан «Андархон» чегара божхона пости орқали мамлакатга кириб келган Б.В. бошқарувидаги Isuzu русумли юк автомашинасини кўрикдан ўтказди. Бу ҳақда Давлат божхона қўмитаси ахборот хизмати хабар берди.
Ушбу автомашина юкхонасида қиймати 1 миллиард 404 миллион сўмлик 2 хил турдаги хорижда ишлаб чиқарилган, жами 184,5 минг қути Business Royal ва Milano номли тамаки маҳсулотлари борлиги аниқланди.
Шундан сўнг олиб борилган қўшимча тезкор-қидирув тадбирлари давомида Данғара тумани, Катта Равон кўчасида яшовчи М.Б.нинг хонадони холислар иштирокида кўздан кечирилганида, бу ерда божхона расмийлаштирувидан ўтганлигини тасдиқловчи ҳужжатлари бўлмаган қиймати 105 миллион сўмлик 15 минг қути Milano номли тамаки маҳсулотлари ноқонуний сақланаётганлиги аниқланди.
Ўтказилган тадбир давомида умумий қиймати 1 миллиард 509 миллион сўмлик жами 199,5 минг қути хорижда ишлаб чиқарилган, акциз маркалари бўлмаган тамаки маҳсулотлари ашёвий далил тариқасида олинди.
Ҳозирда ушбу ҳолат юзасидан текширув ҳаракатлари олиб борилмоқда.
Изоҳ (0)