9 май — «Европа кунлари» байрами арафасида Европа Иттифоқининг Ўзбекистондаги делегацияси раҳбари Эдуардс Стипрайс журналистлар учун матбуот анжумани ўтказди. Бу ҳақда ЎзА хабар берди.
Ушбу сана 1950 йилдан буён нишонланиб келинади. Шу куни Роберт Шуман Европа Иттифоқи тинчлик, ривожланиш ва умумий қадриятларга интилиши туфайли бирлашган олти мамлакат бирлигига асос солган машҳур нутқини ўқиб берган эди. Бугун Европа Иттифоқи таркибида умумий қадриятлар билан 28 та мамлакат бирлашган.
Стипрайснинг маълум қилишича, жорий йилнинг 10 май санасида Тошкентда «Европа кунлари» муносабати билан расмий қабул бўлиб ўтиши кутилмоқда. Ушбу маросимда ҳукумат, халқаро ташкилотлар, дипломатик корпус вакиллари, ҳамкорлар ва журналистлар қатнашиши кутилмоқда.
Европа Иттифоқининг Ўзбекистондаги делегацияси Ўзбекистонда «Европа кунлари» доирасида бир қатор тадбирларни ўтказишни режалаштирмоқда.
Хусусан, ижтимоий тармоқларда 9-31 май кунлари давомида «Сиз ЕИни биласизми?» номли викторина ўтказилади. Ҳар куни Ўзбекистондаги делегацияси саҳифаларида Европа Иттифоқига оид саволлар жойлаб борилади. Унда қатнашиб яхши натижа кўрсатган қатнашчилар ЕИнинг Ўзбекистондаги офисига таклиф этилади ва совғалар билан тақдирланади.
11—18 май саналарида Тошкентда Erasmus + миллий офиси Европада олий маълумот олиш имкониятларига бағишланган тадбирларини ўтказади.
2018 йилнинг 25 май санасидан 30 майга қадар Тошкентда ЕИнинг машҳур ва севимли лойиҳаларидан бири — Европа кино фестивали кунлари бўлиб ўтади. Фестивальда Европанинг 8 давлати — Германия, Латвия, Руминия, Финландия, Франция, Чехия, Швейярия ва Словения каби мамлакатларнинг миллий кинолари намойиш этилади. Доимгидек, киноларга кириш бепул.
Европа киноси фестивали кунлари Тошкентда олтинчи бора ўтказилади. Куз ойида фестиваль Фарғона ва Термиз шаҳарларида ҳам ўтказилиши кўзда тутилган.
Жорий йилнинг 8 июнидан 18 июнигача Тошкент фотография уйида «ЕИ Ўзбекистон барқарор ҳамкорлиги йўлида: анъанавий қадриятлар ва янги имкониятлар доирасида» мавзусидаги фотокўргазма ташкил этилади.
Изоҳ (0)