Ўзбекистон Президентининг «Инновацион ғоялар, технологиялар ва лойиҳаларни амалий жорий қилиш тизимини янада такомиллаштириш чора-тадбирлари тўғрисида»ги қарори қабул қилинди. Бу ҳақда Norma хабар бермоқда.
2018 йилдан бошлаб Ўзбекистонда ҳар йили халқаро интерактив инновациялар ярмаркалари ва халқаро инновацион-инвестицион форумлар ўтказилади. Уларда хорижий инновацион ва илмий марказлар, инвестицион фондлар, технологик агентликлар, технопарклар ва бизнес-инкубаторлар иштирок этади.
Инновациялар ярмаркасини ташкил қилиш тизими учта блокни ўз ичига олади:
«Ташаббускор бизнес». Мамлакат ҳамда илғор хорижий мамлакатларнинг давлат ва хусусий секторлари томонидан маҳаллий ва хорижий технопарклар, технологик агентларнинг тайёр илмий ва инновацион ишланмалар натижаларини ва технологияларни тижоратлаштириш соҳасидаги фаолиятини ёритиш учун ташкил этилган кўргазма майдони.
«Инновацион ечимлар». Ушбу майдонда ички ва ташқи бозорларга чиқиш мақсадида давлат ва хусусий илмий муассасалари томонидан макет ва (ёки) прототип кўринишида энг зўр маҳаллий илмий ва инновацион ишланмалар намойиш қилинади.
«Кооперацион алоқалар». Ушбу платформа мулоқот ва ўзаро фойдали ҳамкорликни йўлга қўйиш, шерикчилик ва иқтисодиётнинг айрим тармоқлари соҳасидаги долзарб масалаларни кўриб чиқиш учун зарур бўлган қарорларнинг миқёсини кенгайтириш учун мўлжалланган.
Инновациялар ярмаркалари «Ўзэкспомарказ» АЖ кўргазма павилонларида ўтказилади. Уларни ташкил этиш билан Инновацион ривожланиш, Иқтисодиёт ва Ташқи ишлар вазирликлари, Инвестиция бўйича давлат қўмитаси ва Савдо-саноат палатаси шуғулланади. Инновациялар ярмаркаларини ўтказиш муддати ва даврийлиги Инновацион ривожланиш вазири томонидан белгиланади.
«Ўзэкспомарказ»га инновациялар ярмаркаларининг иштирокчиларига зарурий кўргазма майдонларини ва конференция залларини ўрнатилган тарифдан 30 фоизлик чегирма билан тақдим этиш тавсия қилинди.
Инновациялар ярмаркалари ва халқаро форумларни ташкил қилиш ва ўтказиш билан боғлиқ харажатлар хўжалик бошқаруви органлари ва йирик давлат корхоналаридаги инновацион фаолиятни қўллаб-қувватлаш жамғармаларининг жами маблағлари 10 фоизи миқдори ҳисобидан қопланади.
Инновацион ривожланиш вазирлиги ҳамда Ахборот технологиялари ва коммуникацияларини ривожлантириш вазирлиги 3 ой муддатда доимий янгиланиб турадиган «Инновацияларнинг виртуал ярмаркаси» интерактив интернет-портали ишлаб чиқилиши ва фаолият юритишини таъминлайди. Унда инновациялар ярмаркалари ва халқаро форумларнинг барча амалдаги ва салоҳиятли иштирокчилари тўғрисидаги ахборотлар ҳамда тижоратлаштириш учун тайёр бўлган инновацион ишланмалар ҳақидаги маълумотлар жамланади.
Изоҳ (0)