Россиянинг Ўзбекистон иқтисодига сармоялари 8,5 миллиард доллардан ошди

Бугунги кунда Россиянинг Ўзбекистон иқтисодига сармоялари 8,5 миллиард доллардан ошди, деб хабар бермоқда Sputnik.

«Ўзбекистонга киритилган сармояларнинг умумий миқдори 8,5 миллиард доллардан ошди», — деди Покровский.

Бундан ташқари, Ўзбекистон товар айирбошлаш бўйича Россиянинг МДҲдаги савдо ҳамкорлари орасида тўртинчи ўринда. Хусусан, ушбу йилнинг январь-февраль ойларида ўзаро савдо миқдори 50 фоизга ошиб 600 миллион доллардан ошди. Россия экспорти салкам 60 фоизга импорти эса 28 фоизга ошди.

Покровский айтишига қараганда, ўзаро савдо-сотиқ ҳажми ошишига Ўзбекистон қонунчилигининг валюта, божхона, солиқ соҳаларидаги либераллаштирув ҳамда ўзаро савдо-сотиқнинг ҳудудлар орасида оптималлаштируви сабаб бўлган.

2017 йилда Россиядан Ўзбекистонга асосан металл, ёғоч, қоғоз, машина ва асбоб-ускуналар, транспорт воситалари, минерал маҳсулотлар ва озиқ-овқатлар олиб келинган. Ўзбекистон эса Россияга тўқимачилик маҳсулотлари, пойабзал, асбоб-ускуналар, озиқ-овқат маҳсулотлари, металлар ва улардан ясалган маҳсулотлар етказиб берган.

Эслатиб ўтамиз, Тошкентда 25—27 апрель кунлари биринчи йирик Россия савдо саноат ярмаркаси бўлиб ўтади. Унда ўз маҳсулотларини Ўзбекистон бозорига олиб чиқиш истагида бўлган 150 дан ортиқ Россия корхоналари иштирок этади. Кўргазма ташкилотчилари «Зарубеж-Экспо» ОАЖ ва Ўзбекистон Савдо саноат палатасидир.