Ўзбекистон Ташқи савдо вазири Жамшид Хўжаев бошчилигидаги делегациянинг Покистонга ташрифи якунланди. Бу ҳақда вазирлик матбуот хизмати хабар берди.
Сафар чоғида қишлоқ хўжалиги ва озиқ-овқат хавфсизлиги, молия ва иқтисодий алоқалар, ташқи ишлар, тижорат ва тўқимачилик саноати вазирликларида музокаралар ўтказилиб, турли соҳаларда келишув ва битимлар имзоланди. Исломобод шаҳрида Ўзбекистон — Покистон ишбилармонлари кенгаши ваколатхонасининг расмий очилиш маросими бўлиб ўтди. Равалпинди Савдо-саноат палатаси ҳамда Покистон — Ўзбекистон савдо ва маданият маркази билан ҳамкорлика иккита бизнес-форум ўтказилди. Мазкур тадбирларда Покистоннинг 170 дан ортиқ компанияси қатнашди.
«Ўзбекистонда ишлаб чиқарилган техника Европадаги муқобилларидан қолишмаслиги баробарида нархи ҳам қулай. Бугунги кунда Покистоннинг биргина тракторларга бўлган эҳтиёжи йилига 20 минг донани ташкил этади. Биз ўзбек техникаларини олиб келиш ва Покистон ҳудудида йиғишни йўлга қўйишдан манфаатдормиз», — деди Покистон қишлоқ хўжалиги ва озиқ-овқат хавфсизлиги вазири С. Босан.
Ўтказилган музокаралар якунида фармацевтика, чарм маҳсулотлари ишлаб чиқариш ва туризм соҳасида умумий қиймати 35,5 миллион долларга тенг инвестиция лойиҳаларини амалга ошириш бўйича битимлар имзоланди. Шунингдек, Покистонга дуккакли ва қуритилган қишлоқ хўжалиги маҳсулотлари, тўқимачилик, чарм ва нефть-кимё маҳсулотларини етказиб бериш бўйича 8,7 миллион долларлик келишувларга эришилди.
Изоҳ (0)