«Ўзбекистон темир йўллари» мева-сабзавот экспорт қилаётганлар учун 50 фоизли чегирма эълон қилди

«Ўзбекистон темир йўллари» АЖ мева-сабзавот маҳсулотлари экспортини амалга ошираётганлар учун чегирмалар эълон қилди.

Улар қуйидагилардан иборат:

Ўзбекистон ҳудудида янги етиштирилган ҳўл мева ва сабзавотлар ҳамда қайта ишланган мева-сабзавот маҳсулотлари экспорт йўналишида ташилганида 50 фоизлик чегирма қўлланади. Чегарадош темир йўл бекатларидан 200 километр узоқликда жойлашган темир йўл бекатларидан рефрижератор секцияларда ташилганида қўшимча 30 фоизлик чегирма тақдим этилади;

Қозоғистон ҳудуди орқали Ўзбекистонда янги етиштирилган ҳўл мева ва сабзавотлар, картошка ва товуқ гўшти олиб ўтиш учун транзит ташувларида 50 фоиз чегирма қўлланилиши тартиби ўрнатилган;

Россия ҳудудига янги етиштирилган ҳўл мева ва сабзавотлар рефрижератор вагонларда олиб кирилганда Россия давлати томонидан 50 фоизлик чегирма қўлланади.

Тадбиркорларга қулайлик яратиш мақсадида батафсил маълумотлар олиш ҳамда ҳужжатларни расмийлаштириш учун «Ўзбекистон темир йўллари» АЖ минтақавий темир йўл узеллари таркибида махсус бўлинмалар ташкил этилди.

Мазкур чегирмаларнинг тақдим этилиши «Ўзтемирйўлэкспедиция» унитар корхонаси орқали амалга оширилади.