Ўзбекистон Тикланиш ва тараққиёт фонди ижрочи директори Шуҳрат Вафоев Буюк Британияга ташрифи чоғида Bloomberg Daybreak Europe журналистлари билан суҳбатлашди, деб ёзади Spot.
Ўзбекистоннинг еврооблигацияларни жойлаштириш бўйича режаларини изоҳлаш ҳақидаги саволга Вафоев нуфузли халқаро банклар билан ушбу соҳада Ўзбекистоннинг мустақил рейтингини олиш борасида молиявий масалалар бўйича маслаҳатлашувлар олиб борилаётганини айтди.
«Ликвидлилик бўйича Ўзбекистон юқори кўрсаткичларга эга бўлгани сабабли, биз еврооблигацияларни жойлаштиришни ликвидлилигимизни ошириш ёки бюджетимиз ресурсларини тўлдириш мақсадларида режалаштиряпмиз. Бу кўпроқ, лимит нархни, стандартни белгилашга, турли инвестициявий лойиҳалар устида ишлаётган йирик корхоналаримиз учун халқаро бозорларни очишга қаратилган», — деди Вафоев.
Шунингдек, Шуҳрат Вафоев Буюк Британияга энергетика ва нефть-газ секторидаги инвестициявий лойиҳаларни қўллаб-қувватлашга қаратилган бизнес-форумда қатнашиш учун келганлигини айтди.
Тикланиш ва тараққиёт фонди раҳбари Ўзбекистондаги ислоҳотлар шунчалик тезкорлик билан ривожланаётгани, натижада ҳаммасини эътиборга олиш баъзан имконсиз эканлигини таъкидлади.
Олтин соҳасидаги ислоҳотларга келсак, унинг фикрича, бу ерда ўзгаришлар юз беради: «Билишимча, биринчи навбатда Марказий банк мамлакат ичида олтин савдосини либераллаштиришга алоқадор таклифларни илгари суришни бошлайди. Шу тариқа, олтин сотиш, шунингдек, тақинчоқлар чиқариш жараёнига алоқадор аҳоли ва корхоналар рақобат асосидаги ва етарлича арзон олтин билан таъминланиш имкониятига эга бўлади», — деди Вафоев.
Суҳбат охирида интервью олувчилар айни пайтда Буюк Британияда қандайдир активларни сотиб олиш бўйича музокаралар олиб борилаётгани ёки йўқлиги ҳақида сўради. «Йўқ, бизда Ўзбекистонда ривожланишни талаб қилаётган томонлар ўта кўп, шунинг учун биз бу ерда футбол жамоаларини сотиб ололмаймиз», — дея ҳазил қилди Вафоев бунга жавобан.
Изоҳ (0)