Эшак гўшти, «Шаршара» колбасалари, фарғоналик қассоб иқрори

ЎзА ахборот агентлиги сифатсиз истеъмол маҳсулотлари билан боғлиқ муаммони кўтариб чиқди. Мақолани тўлиғича келтириб ўтамиз.

Сўнгги пайтларда сифатсиз истеъмол маҳсулотлари билан боғлиқ муаммо яна кун тартибига чиқишни бошлади. Ижтимоий тармоқларда сифатсиз маҳсулот сотиб олган харидорларнинг шикояти кун сайин кўпаймоқда.

Биргина эшак гўшти билан боғлиқ можароларни ёдга олайлик. «Шаршара» колбасалари, Самарқанддаги эшаклар қабристони ҳамда фарғоналик қассоб иқрорномалари бу борада муаммолар жуда чуқур илдиз отгани, унга қарши курашиш, назоратга олиш учун эндиликда бир давлат органининг кучи камлик қилиши аён бўлгандек гўё.

Аслида ҳаётимизнинг ажралмас бир қисмини бирон маҳсулот сотиш ёки сотиб олишдан иборат десак муболаға бўлмайди. Кундалик харидларимизнинг асосий қисмини эса озиқ-овқат маҳсулотлари ташкил этади. Ҳар доим ҳам сотиб олаётган озиқ-овқат маҳсулотларининг ишлаб чиқарилган санаси, таркиби каби жиҳатларига эътибор қилавермаймиз. Бирор сифатсиз ёки яроқлилик муддати ўтган маҳсулотдан зарар кўрган тақдиримиздагина бу ҳақида ўйлаб қоламиз. Бир нарсага эътибор қаратиш керак. Истеъмолчилар олаётган маҳсулотига эътибор қилмади ҳам дейлик. Лекин ишлаб чиқарувчи ёки хизмат кўрсатувчилар нима учун бунга эътибор қилмаслиги керак?! Ахир сифатсиз, яроқлилик муддати ўтган маҳсулот инсон ҳаёти учун жиддий хавф туғдирадику!

Хориж тажрибасига қарайдиган бўлсак, уларда назорат хариди йўлга қўйилган бўлиб, бу инсон саломатлиги учун жиддий зарар келтирувчи маҳсулотлардан сақланишда муҳим аҳамиятга эга. Савол туғилади. Назорат харидининг ўзи нима?

Назорат хариди бу — савдо расталарида сотилаётган маҳсулотлар харид қилиниб, лабораторияларда экспертизадан ўтказилади. Сифати талабга жавоб бермайдиган, давлат стандартларига мос бўлмаган маҳсулот ҳамда уни ишлаб чиқариш (сотиш) билан шуғулланувчилар оммавий ахборот воситаларида эълон қилинади. Яъни, туғилиши мумкин бўлган хавфдан жамоатчилик огоҳлантирилади ва бунга нисбатан жамоатчилик ўз муносабатини билдиради.

Натижада маҳсулот ишлаб чиқарувчилар (сотувчилар) сотаётган товарининг сифатли бўлишига ҳаракат қилади ҳамда одамлар сифатсиз, зарарли маҳсулотлардан ҳимояланади.